Shillong, Nailar 01
Ka tnat Transport ka Sorkar Jylla ka la pynmih ïa ka jingpynbeit thymmai ha kaba ïadei bad ka rukom pyrkhing ïa ki kali kiba dei ban ïaid lyngba ka jingkieng dam Umïam ha kaba yn shah ïa ki kali kiba jrong 2.8 metre na surok sha tnum kali, bad ki kali kiba ka jingkhia ka long tang hapoh 9 Metric Ton (MT).
Katkum ka jingpynbna kaba la pynmih da u Sanjay Goyal uba dei u Commissioner & Secretary ka tnat Transport la ong ba kane ka jingpyrkhing ka long katkum ka Section 113 jong ka Motor Vehicles Act, 1998 bad ka kyndon 95 jong ka Central Motor Rules 1989 ha kaba ïadei bad ka jingplie ïa ka jingkieng dam Umïam ban ïaid ki kali ha ryngkat ka jingpyrkhing ïa ka jingkhia bad jingshngaiñ ban ïada ïa ka jingkieng na ka jingma.
La ong ba kane ka jingpynbeit thymmai ïa ka jingpyrkhing kan treikam noh mar-mar naduh ba la pynmih ïa ka jingbthah.
Ha ka 30 tarik Naitung kaba dei ka sngi ba plie ïa ka jingkieng dam Umïam baroh arliang, la shah shwa ban ïaid tang ki kali kiba ka jingkhia ka dei ban long tang hapoh 4 Metric Ton.Hynrei mynta da kane ka jingpynbeit, la shah ban ïaid ki kali kiba ka jingkhia ka long hapoh 9 MT.
