Shillong, Nailar 01
U MLA ka South Shillong, Bah Sanbor Shullai u la ong ba wat u MLA uba jaituh uba shong ha jingthiah ruh u ïoh ïa ka MLA Scheme kaba T.250 lak. Kumta ym dei ban shu hun tang ïa kane, hynrei dei ban trei bad pynshitom ban wad ïa kiwei pat ki skhim na ka bynta ka bit ka biang ka constituency.
U Bah Sanbor u la ong, “Kum ki MLA wat hun tang 250 lak hynrei bud ïa ka nuksa ka jong nga, kumno ban nang ban wanrah skhim bad lada kim nang ne tip ki lah ban wan sha ïing jong nga, bad ban bud ïa nga ban ïalam pynïoh ïa ki scheme na ka bynta ki kam pynroi hapoh ka constituency.”
Halor ka jingong ba ki MLA kiba don ha ka Liang Pyrshah kim lah ban trei, u Bah Sanbor u la ong ba kata kam long ka jingshisha namar ka shong beit ha ka jingtrei shitom kaba wanrah bun ki lad ban ïoh ïa ki scheme.
U Bah Sanbor u la tyrwa ruh ban ïarap ïa kiwei ki MLA ban ai jingtip kumno ba kin ïoh ïa ki scheme nalor ka MLA scheme kaba la mang lypa. U la ong ba ka ïing jong u ka plie na ka bynta kiwei ki MLA baroh 24 kynta, bad wer ïa ki ban wan sha ïing jong u ban ïasyllok, wat ban ïalam ïa ki sha Delhi.
“Kane ka jingïoh scheme jong nga, ka dei lyngba ka jingtrei shitom ban leit wad na Delhi, na Secretariat, na ki ophisar bapher bapher,” u la ong bad bynrap “Nga hap shong ha miej ki Peon kylleng kylleng, ha kaba ngi ïa bam kwai, katba dang ap ïa ki Myntri kiba dang shong jingïalang, kane ka ai jingmyntoi. Hato ka long poh mo ban shong bad ki Peon ne ban ap ïa ki ophisar? Nga ïoh ban ïasyllok bad ki scheme ruh ki ïaid shaid-shaid. Kane ka dei ka jingmyntoi jong u paidbah, namar haba nga jop da jingieit nga hap ruh ban shakri da ka jingieit.”
