Shillong, Nailar:
U MLA ka South Shillong, Bah Sanbor Shullai ha ka Sngi Palei u la pyntip ba tang ha ki 3 snem u la lah ban wanrah haduh palat 100 klur tyngka ka skhim hapoh ka constituency, haba jubab ïa ka jingkynthoh u MLA ka Nongkrem halor ka MLA scheme kaba long 2.50 klur tyngka. U Bah Sanbor u la pyntip ba ïa ka MLA scheme jong ka Special Urban Work Programme (SUWP) 2023-24 lei u la dep ban pyllait naduh u bnai Kyllalyngkot 2024, bad pynbna ruh ba nalor ka 2.50 klur, uwei-pa-uwei u MLA u ïoh sa 8 lak tyngka ym tang 3 lak tyngka. Kane ka 8 lak tyngka kaba ïoh ka long na ka scheme ISYDP ïoh 3 lak tyngka, ka DTFM 2.5 lak bad ka IACDP kaba 2.5 lak tyngka.
Ïa kane u Bah Sanbor u la kren sha ki lad pathai khubor ha ka Sngi Palei hadien ba la wai ka jingïalang ha kaba u la lum ïa ki ophisar, ki engineer na ki tnat treikam bapher bapher ka Sorkar kynthup ruh ïa ki nongïalam shnong kiba napoh ka constituency ïa kaba la pynlong ha State Convention Centre.
Ha kane ka jingïalang na ka liang u MLA u la ïoh ban ïatai ïathir ïa shibun ki kam pynroi kiba ïadei bad ka constituency, don kiba la sdang bad don pat kiba dang thmu ban sdang bad kiwei kiwei ki kam pynbit-pynbiang jong ki shnong ki thaw.
U Bah Sanbor u la pyntip ba tang ha kine ki 3 snem u la lah ban wanrah skhim kaba la kot shaduh ka 107,46,16, 843.00 tyngka, kiba la lah ban pynïoh na Delhi bad kumjuh ruh na ka Sorkar Jylla.
“Nga lei nga la dep ban pyllait ïa ka MLA skhim kaba 250 lak tyngka naduh u bnai Kyllalyngkot, 2024, hynrei ka la mih ka jingkynthoh ba nga pynbna sarong ïa ka 10 lak tyngka jong ka Discretionary Grant kaba dei ka hok jong u paidbah, ha kaba ki la don ki MLA kiba ong hana, balei u Sanbor u ïathuh khana sarong?,” la ong u Bah Sanbor.
U Bah Sanbor um shym la jer kyrteng ïa u MLA ba la kynthoh halor ka MLA scheme, hynrei dang shen hadien ba u Bah Sanbor u la pynbna paidbah ïa ka Discretionary Grant kaba 10 lak tyngka, na ka liang u MLA ka VPP na Nongkrem ha ka jingïalang sam scheme u la kynthoh ïa u Bah Sanbor da kaba ong, balei u ïathuh khyllew ïa ka 10 lak? Balei um ïathuh ïa ka 250 lak?. Halor kane, u Bah Sanbor u la ong ba ka la don ka jingkynthoh hadien ba u la pynbna ïa ka hok kaba 10 lak ka Discretionary Grant (DG), da kaba ong ba u Bah Sanbor u ïathuh khana sarong ïa kata ka 10 lak, da kaba bynrap ba imat kane ka jingkren jong u ïa ka hok ki paidbah ka la don jingthut jingmong ïa kiwei.
“Nga kmen ban pyntip ba nga dei u MLA ba nyngkong duh ban pyllait ïa kata ka 250 lak bad ruh sa ka 8 lak naduh u bnai Kyllalyngkot. Kane ka jingpynbna biang mynta ka sngi kan long tang kum ka jingpynkynmaw ïa kiba kynthoh,” u la ong.
