Mawkyrwat, Nailar 02
Ki nongtrei jong ka Civil Hospital Mawkyrwat kynthup naduh ki doktor, ki nos bad kiwei-kiwei namar ka jingshah set tulop mynta la 3 bnai, kata naduh u bnai Jymmang 2024, ki la byrngem ban sangeh treikam noh naduh ka 9 baje mynstep jong ka 5 tarik u Jymmang 2024, kata ïa ka OPD bad ïa ka ‘Emergency Services’ katba ka Sorkar kam pat pyllait ïa ka tulop jong ki.
Katkum ki tyllong khubor ba la ïoh lum, la ïathuh ba ha ka 1 tarik u Nailar, 2024, ki nongtrei jong ka Civil Hospital Mawkyrwat halor kane ka jingeh namar ka jingshah set tulop ki la leit ban ai da ka kot jingthoh sha ka ophis Director of Health Services (MI) Shillong, kumjuh sha ka ophis jong u Medical Superintendent, Mawkyrwat Civil Hospital bad sha ka Myntri ka tnad ka koit ka khiah, ka Dr. Ampareen Lyngdoh.
Haba ïakren bad ki katto-katne ngut ki doktor jong ka Civil Hospital, Mawkyrwat ki la ïathuh ba hadien ba la dep ban ai ïa ka kot jingthoh hynnin ka sngi, ka Sorkar ha ka por janmiet ka la pyllait noh ïa ka tulop ba shi bnai jong u bnai Jymmang.
Shuh shuh ki la ïathuh ba ha kaba ïadei bad ka jingshim rai ban sangeh treikam ha ka 5 tarik, na ka liang ki nongtrei jong ka Civil Mawkyrwat kin sa shim ïa ka rai lashai ka sngi kaba dei ka Sngi Saitjaiñ namar kumba long mynta ka Sorkar ka la dep ban pyllait ïa ka tulop jong u bnai Jymmang bad kaba sah ka long sa tang u bnai Jylliew bad Naitung.
