Shillong, Nailar 02
Ka Hynñiewtrep Border Dispute Redressal Forum (HBDRF) ka la ban jur ïa ka Sorkar Jylla ban shimkhia halor ka kylla ba-ar jong ka jingpynbeit pud bad ka Sorkar Assam da kaba leit sha ki jaka kiba don hapdeng ka jingïakajia bad ym ban shu ïakren tang hapoh ophis treikam.
“Kumba ngi la ïohi ba ki Regional Committee (RC) shen kin sa sdang biang ïa ka jingïakren halor ka jingpynbeit pud, hynrei ngim ïohi pat ba kine ki komiti kin kynthup lang ïa ki Waheh Shnong, sengbhalang, ‘riew rangbah na Block-I bad II,” la ong u nongaiktien ka HBDRF, Bah Thomas Passah.
Ha kajuh ka por, u la ong ba kam don ka jingïamir jingmut na ka liang ka Sorkar bad ki ‘riew paidbah ba don ka jingsngewkhia bad i kumba ka rukom treikam jong ki komiti (RC) ka lah ban long tang ha suiñ.
“Lada ka long kumne, kata kan long kumjuh kumba long ha ka kylla banyngkong jong ka jingpynbeit pud bad ïa kane ngi pyrshah jur. Na ka liang jong ngi, ngi sngew ba haba pynbeit ïa ka kylla ba-ar khamtam ïa ki jaka ba kongsan kum ka Block-I bad II, Langpih bad kiwei-kiwei, ka Sorkar kam dei ban shim sting,” u la ong.
U Bah Passah u la kdew ruh ba ka Sorkar ka dei ban leit shaduh kito ki jaka kiba don hapdeng ka jingïakajia bad ym ban shu pynbeit ne ïakren tang ha ophis naba ka seng kan ym pdiang satia ïa kane.
Hashuwa kane, ka Sorkar Jylla ka la ong ba ki RC jong ka Meghalaya bad Assam shen kin sa ïakynduh haba ïadei bad katei ka bynta.
Kine ki komiti kiba la thaw na bynta ka kylla ba-ar jong ka jingïakren pynbeit pud bad ka Assam, ki la ïoh por shuh, kata haduh ka 30 tarik u Nailur, 2024 – ban aiti ïa ki kaiphod sha ka Sorkar Jylla.
Kane ka jingpyntip ka la wan lyngba ka jingpynbna na ka tnad kam pohïing (Political) ha u bnai ba la dep.
Kum ban shu kdew hangne, ka Sorkar Jylla ka la thaw biang ïa 3 tylli ki Regional Committee ban khmih bniah halor ka jinglong-jingman jong 6 tylli kiwei pat ki jaka ba don hapdeng ka jingïakajia (ba dang sah) ba kynthup ïa ka Langpih ha West Khasi Hills; Borduar, Nongwah-Mawtamur, Deshdoomreah bad Block-II ha Ri-Bhoi; Block-I, Psiar-Khanduli ha West Jaiñtia Hills.
Shuh shuh ka la don ka jingïalang ha u bnai Nailur mynshem snem hapdeng ki Myntri Rangbah jong ar tylli jylla ha Shillong ban ïakren halor ka mat ba ïadei bad u pud u sam.
