Shillong, Nailar 02
Ka shi kol ba la thep da u Wadajied Kynsai Ryngkhlem ka la biang pura ïa ka Shillong Lajong FC ban pynliem noh ïa ka Tribhuvan Army FC kaba na Nepal da 1-0 kol na ka bynta ban ïoh ïa ka jingjop kaba nyngkong ha kaba sdang ïa ka Group-F jong ka lympung ïalehkai 133rd IndianOil Durand Cup ha ka Sngi Thohdieng ha Jawaharlal Nehru Stadium.
Ïa kane ka lympung la plie da u Myntri Rangbah ka Jylla u Conrad K Sangma, ha kaba la ïadon lang u Myntri ka tnat ïalehkai u Bah Shakliar Warjri, kumjuh u Myntri ka tnat Poh-ïing u Bah Prestone Tynsong, u Myntri ka tnat pynroi sor u Bah Sngiawbhalang Dhar, u Myntri ka tnat jngoh kai u Bah Paul Lyngdoh, kumjuh u Air Marshal S.P Dharkar, PVSM, AVSM, Air Officer Commanding in Chief ka Eastern Air Command bad Lt. General Ram Chan -der Tiwari, UYSM, AVSM, SM, GOC-in-Chief ka Eastern Com-mand bad kiwei kiwei.
Kane ka lympung ka long kaba nyngkong eh na ka bynta u Jose Carlos Rodriguez Hevia ba un shimti ha ka sien ba ar ïa ka Shillong Lajong bad da shisha kane ka kynhun ïalehkai na ka nongbah ka la lah ban khur ïa ka jingjop kaba nyngkong eh shwa ba kan pynkhreh ban ïa aireng sa ïa kiwei pat ar tylli ki kynhun ïalehkai jong ka Indian Super League, kata ka Hyderabad FC bad ka FC Goa.
Haba phai sha kane ka jingïalehkai la ong baroh ar kynhun ki la pyrshang ban ïakhun tyngeh hynrei ka Lajong ka la ïoh ban pynkhih jar nyngkong eh ha ka minit kaba 6 lyngba u Wadajied ha kaba u rangapkol ka liang pyrshah um shym la lah ban khanglad na kane ka jingshah thep.
Kane ka shi kol ka la nang pynïoh mynsiem ïa ki rangïalehkai ka Lajong lyngba ka jingkyrshan na ki paidbah nongpeitkai bad ka la ïoh ruh ban thep ïa ka kol ba ar, hynrei na ka liang u ‘linesman’ u la rah ïa ka lama ba ka dei ka ‘offside’.
Wat la ka liang pyrshah ka la pyrshang ban ïakhun tyngeh, hynrei kam shym la lah ban pynphai haduh kaba kut ka jingïalehkai bad mad ïa ka jingshah rem ha kane ka lympung.
Ha kane ka jingplie ïa kane ka lympung ka la long kaba ishongkun bad pynshoh biej ïa kiba bun ki paidbah nongpeitkai lyngba ki jingpyni ïa ki sap ñiah thuk thuk jong ka kynhun shipai ryngkew, ki jingshad na ka kynhun shipai jong ka Sikh Regiment bad ka jingïashim bynta haduh 800 ngut ki khynnah skul ha ryngkat ka jingrwai na ki nongrwai ba paw ka Jylla kum ka Gracyl Ropmay bad ka Dapelai, u Lamphang bad ka Choir nalor kiwei pat.
