Jowai, Nailar 02
Ka Khliehmyntang Ïalong bad ka Dulong ki la jop katba ka Pateinki Sabah, Panaliar, Mookyndur bad FAM ki la ïasam mar shi point ha ka lympung ïalehkai Under -17 Football Tournament-Independence Day Cup 2024 ba la pynïaid da ka West Jaiñtia District Sports Association (WJDSA).
Ha kane ka jingïaleh-kai kaba la long ha ka Sngi Thohdieng ha madan Kiang Nangbah Stadium, Jowai, ka Khliehmyntang Ïalong ka la pynliem noh ïa ka Caroline lyngba ka shi kol ba la thep da u Daïolang Pale ha ka minit kaba 49.
Ha kawei ka jingïakhun ka Dulong ka la pynliem ïa ka Da-i-Hi Mynsngat da 3-0 kol. Ïa kine kol la thep da u Shwami Suchiang ha ka minit kaba 8, kum-juh u Eristien Pakma (35) bad u Emonmi Hadia (60+3)
Ha ar tylli kiwei pat ki jingïalehkai hapdeng ka Pateinki Sabah pyrshah ïa ka Panaliar bad ka Mookyndur ïa ka FAM ki la kut ha ka jingïakhaid hadien ba kim shym la lah ban thep kol haduh kaba kut jingïalehkai.
