Khliehriat, Nailar 02
Ïa ka ‘World Breastfeeding Week’, ne ka taïew ai-buiñ kmie ha satlak pyrthei la rakhe halor ka phang ‘Clossing the Gap: Breastfeeding support for all’ la sdang ha ka 2 tarik Nailar ha East Jaiñtia Hills District ha ka jingïalang kaba la long ha Rymbai PHC ha ka jingdonlang ka District Immunization Officer, East Jaiñtia Hills District, ka Dr. N.P. Suchiang, Medical & Health Officer, Rymbai PHC, Dr. L. Kharnaïor, ki nongtrei ka tnad ka koit ka khiah, ki ASHA bad ki paidbah ka thaiñ Rymbai.
Ka District Immunization Officer, East Jaiñtia Hills District, ka Dr. N.P. Suchiang ha ka jingkren ka la ong ba ïa ka ‘World Breastfeeding Week’ la rakhe man u snem halor ka thong ban pynsngewthuh paidbah ïa ka jingkongsan ban ai-buiñ ïa ki khyllung bad ban pynsngewthuh ruh halor ka jingktah jong ka jingai dud ïa ki khyllung kiba dangkha, ka jingma na ki bilor dud bad kiwei-kiwei.
Ka la kren ruh ki katto-katne ki jingmyntoi ba ki khyllung kiba dang kha kin ïoh na ka dud kmie bad ki jingdonkam jong ka longkmie kaba pun khun ban ïoh ïa ki jingbam kiba tei kumjuh hadien ba ka la dep kha.
Ka Dr. Suchiang ka la pynshai ruh ïa ki jingmyntoi bapher-bapher ba ki khyllung kiba dang kha kin ïoh lyngba ka buiñ na ka kmie ym tang ba ka kyntiew ïa ka jingkoit jingkhiah jong ki khyllung ba dang kha hynrei ka pynheh pynsan bad ïarap ruh ban pynlong ïa ka jingïadei kaba skhem hapdeng ka kmie bad u khyllung lyngba ka jingïadei jong ka sniehdoh bad ha kajuh ka por ka la pynshlur ïa ki ASHA ban bteng ban hikai ïa ki nongshong shnong shaphang ka jingkongsan ban ai buiñ kmie.
