Jerusalem, Nailar:
U Myntri Rangbahduh ka Israel- u Benjamin Netanyahu ha ka Sngi Palei haba ai jubab halor ka jing byrngem jong ka Iran ban leit hiar thma ia ka Israel, u la ong ba ka Israel ka long ba la pynkhreh ia kino- kino ki jingeh bad ki thma kiba lah ban wan. Kane ka long hadien ba ka Hamas ka la pharep bad kynnoh pyrshah ia ka Israel ba dei ka Israel kaba leit ban thombor ha ka jaka sah u nongialam ba hakhlieh duh jong katei ka kynhun, u Ismail Haniyeh uba la khlad noh ha katei ka jingjia dang ha kine ki khyndiat sngi ba la leit.
Kumta, utei u nongialam ka Israel wat haduh mynta- mynne ruh um shym treh ban pyndep hakhmat jong kitei ki ri lehnoh kiba buh jingma bad byrngem ia ka Israel namar ka jingleit hiar thma jong ka Israel ia ki Hamas bad u la ong ba ka Israel kam salia ban ialeh pyrshah bad kino-kino ki jingeh ne ki nongshun kiba wan ban pynwit ha ka lynti iaid jongka. Namarkata, u la ong ba kito kiba ktah kti bad thombor ia ka Israel, ka Israel ruh ban pynphai kylliang ha kajuh hi ka rukom.
Namar la ong ba u nongialam ka Hezbollah ruh, u Hassan Nasrallah ha katei ka sngi u la byrngem tyngeh ia ka Israel ba ka Hezbollah kan pynhiar kput halor ka jingleit thombor bad jingshim jong ka Israel ia ka jingim jong utei u nongialam ba hakhlieh duh jong ka kynhun lehnoh Hamas hapdeng ka jingleit jong u sha Iran ban sakhi ia ka jingpynbam smai ia u President ka Iran ha ki khyndiat sngi ba la leit.
