Shillong, Nailar:
U Organising Secretary jong ka Voice of the People Party (VPP) Jaiñtia Hills District, Bah Damewanhi Rymbai u la ong ba ka ophis jong ka Jaiñtia Hills Autonomous District Council (JHADC) kam dei ka ïing lok, ïing khun ne ïing kmie jong u Bah Thombor Shiwat uba dei u Chief Executive Member (CEM) ba mynta hynrei ka dei ka ophis jong ki paidbah.
U Bah Rymbai ha ryngkat ka jingïadonlang ki para nongkitkam ha jingïakynduh bad U Nongsaiñ Hima hadien ba la wai ka jingïalang ka VPP ha ïew Wahïajer, u la ong ba um donkam ban panmap na u CEM halor kata ka jingkynnoh ba buhrieh ïa ka pisa 20 klur tyngka.
U la pynpaw ba kumba kren u Bah Ardent ba u CEM ka JHADC u dei ban panmap na ki paidbah namar ba u la buhrieh ïa ka pisa.
U la buh jingkylli ruh hato kum ki paidbah kim don hok ban tip ïa ka pisa ba ai ka sorkar sha ka JHADC? Namar lada dei pisa shimet jong u CEM ka seng kam don hok ban tuklar haba dei pisa paidbah baroh dei ban tip.
“Ka jingduh tulop ki nongtrei ka la pynlong ïa ngi ban leit ïakynduh ïa u CEM ka JHADC kat haduh ba kan paw pyrthei ka 30 klur hynrei ha ka jingïathuh ha ka sien kaba ar u khlem pyntip shuh ba ka sorkar ka dang pyllait ïa ka pisa kaba 20 klur” u la ong.
Nalor kane, u Bah Rymbai u la pynpaw ka jingsngewsih namar u CEM u pynpaw ïa ki ktien khlemakor ïa ka seng VPP namar u kynnoh ba kam don hok ban tip namar ka dei ka kamram jong ki.
U la kynnoh ba u CEM ba mynta u dei uba khyllew namar um patiaw ïa ka pisa jong ki paidbah hynrei ka mih pyrthei da ka jingmih ka seng VPP.
“Ngi khlem kynnoh ba ki pyndonkam bakla ïa ka pisa, ka NPP bad u CEM ki don ka hok ban ïoh ïa ka burom haba ki la trei shitom ban pynïoh ïa ka pisa” u la ong.
Ha kajuh ka por u la ong ba lada u CEM u dawa panmap un nym panmap, hynrei lada don ba buh kawei ka jaka ban ïatai nia u kloi ban mih pyrthei.
