Shillong, Nailar:
U Working President ka Khun Hynñiewtrep National Awakening Movement (KHNAM), Bah Thomas Passah u la ong ba ka jingkren kaba dang shen kaba la kren da u Myntri Rangbah ka jylla u Conrad Sangma halor ki kot ki sla trei kam ka long kaba ïalam bakla.
U Bah Passah u la ong ba wat lada ngi ïakren halor ka Meghalaya Identification, Registration (Safety & Security) jong ki nongtrei bylla sngi, 2020, kaba la thaw da ka MDA hi, ka la kdew shai ba ka jingpynrung kyrteng bad ka jingpynshisha da ki pulit ïa ki nongbylla sngi ka long kaba donkam.
U la ong ruh ba katei ka aiñ ka la kdew shai ba dei ban don ka kynhun ban peitngor ïa ka jingwan rung ki nongbylla sngi sha kane ka jylla.
“Ki jingkhynra bapher-bapher ba la pynlong da ki kynhun pynbor ki long kiba don nongrim namar ba ka sorkar kam shym la lah ban peit bniah ïa kane ka kam,” u la ong.
U la ong ba ka sorkar MDA ka tip bha ba ka tnad labour kaba dei ban peit ïa kane ka kam, kam don wat tang kano-kano ka lumthup ba ki nongwan buhai shnong kiba rung kin shah rai pynrem ne em.
“Kane ka aiñ ka buh jingkitkhlieh ruh ïa u kontraktor uba wanrah ïa ki nongtrei bylla ri, bad ba um lah ban pynrung kyrteng ïa ki nongtrei palat ïa ka 179 sngi, hynrei haba ka tnad nongtrei kam buddien eiei katkum ka aiñ, te kine kiei kiei kin sa jia,” u la ong. la ong.
“Da kaba bun ki nongshong shnong beaiñ mynta ha ka jylla, ki kynhun pynbor ki don ka hok ban sngewkhia ïa ka jingwan ki nongwan buhai shnong khlem kano-kano ka jingkhanglad kiba lah ban phai suki suki sha ki nongshong shnong beaiñ hangne,” u la ong.
Haba pynpaw ba ka aiñ bad ki kyndon ki don tang ha ka kot khlem kano-kano ka jingpyntreikam kaba pyrkhing da ki nongtrei bad ka sorkar, u Passah u la ong shuh shuh ba ka sorkar MDA ba ïalam da ka NPP ka pyni tang ba ki kyntiew ïa ka jingtuid jong ki nongwan buhai shnong ha ka jylla da kaba khang duna eh.
“Haba ngi la leit jngoh ïa ka khyrdop talasi Infiltration ha Umling, la ïoh jingtip ba ka jingtalasi hangtei kam long satia kaba biang, bad ki duna bor briew,” u la pynpaw.
U la ong ba ka MDA ka tip bha ïa kiei-kiei baroh hynrei kam don jingkitkhlieh satia.
“U Conrad Sangma u ong ba ki NGO ne kino-kino kim don hok ban talasi bad kyndang hynrei ngi ong wat lada ngim don hok ruh ngi don ka jingkitkhlieh katba ka sorkar pat kam don,” u la bynrap.
