Shillong, Nailar 02
Ka Kynhun Myntri ka Sorkar Jylla ka la ai jingmynjur ban pyntreikam noh ïa ka ‘Online Portal’ ban pynrung kyrteng ïa ki samla pule bad kiba trei shabar Jylla khnang ba kan long ka jingpynsuk ïa ka Sorkar ban lum jingtip shaphang jong ki khamtam haba jia kino-kino ki jingkulmar ne jingïakynad ha ki jaka ba ki don ma ki ban leit trei ne leit pule.
Ïa kane la ïathuh da u Myntri Sorkar u Bah Paul Lyngdoh hadien ba la wai ka jingïalang ka Kynhun Myntri ha ka Sngi Thohdieng.
U la ong ba kane kam dei ba ki samla pule bad kiba trei shabar Jylla ki hap ban pynrung kyrteng beit hynrei ka dei ka mon jong ki namar ka Sorkar ka donkam ban don lypa ha ka thup ïa ki briew jong ka kiba leit pule bad leit trei shabar jong ka Jylla khamtam lada jia kano-kano ka jingjia kum ka jingïakynad kaba la jia dang shen ha Bangladesh.
Ki kyrteng jong kito kiba la pynrung kyrteng yn nym pyllait paidbah hynrei yn buh khop namar ka dei tang ban ïoh jingtip ïa ki jaka pule bad jaka trei jong ki khnang ban suk ka Sorkar Jylla ban wad ïa ki haba jia ki jingkulmar ha kito ki jaka ba ki leit pule ne leit trei.
