Jowai, Nailar 02
Ka ophis u District Medical & Health Officer, Jowai, West Jaiñtia Hills da ka jingïatreilang bad ka ophis u Deputy Commissioner, Meghalaya Aids Control Society, Shillong bad kiwei-kiwei ki tnad treikam Sorkar haka 2 tarik Nailar ka la sdang ïa ka ‘Integrated Health Camp’ ha West Jaiñtia Hills District ban ai ka jingsumar kaba janai hapoh 2 bnai sha baroh ki nongshong shnong ka distrik bad ban pynlong ïa ki 17 tylli ki ‘Static Camp’ bad ‘Outreach Service’ ban kynjoh sha ka 150 haduh 200 tylli ki shnong hapoh ka distrik.
Hapoh kine ki 2 bnai ki nongïoh myntoi kin ïoh ïa ki jingshakri kiba bun jait kiba kynthup ïa ka jingpeit bniah ïa ka koit ka khiah bad jingsumar ïa ka jingpang ‘Tubercolosis’ (TB), HIV, ka jingpeit bniah ïa ka jingpang ‘Hepatitis’ B bad C ryngkat ka jingpynrung kyrteng hapoh ka MHIS bad kumjuh ruh ka jingleit jngoh sha man ki thliew ïing.
Ha kane ka sngi u Bah A. Lipon, President ka Synjuk Ki Waheh Shnong Ri Jaiñtia u la long kum u kongsan ha ka jingdonlang u Waheh Shnong, Ladthadlaboh, Bah A. Shullai, bad kiwei ki nongtrei ka tnad ka koit ka khiah.
U Bah A. Lipon, ha ka jingkren u la ong ka koit ka khiah ka long kaba kongsan bha na ka bynta uwei-pa-uwei u briew. U la ai ka jingïaroh ïa ka jingpyrshang jong ki nongtrei ka tnad ka koit ka khiah bad u la pynshlur ïa ki paidbah ban ïashim bynta shitrhem bad bad ban shim kabu ïa ki lad jingsumar ba la wanrah ha jingkhang jong ki da ka tnad ka koit ka khiah.
Ka Dr B. Decruse, Project Director, MACS ha ka jingkren lamkhmat ka la ïathuh ïa ka jingthmu jong kane ka jingïalap bad kyrpang ruh na ka bynta ki shnong kiba don sha ki thaiñ nongkyndong.
Ka la kdew ruh ba ka HIV kan dei ka thong kaba kongsan ha kane ka jingïalap bad ka la pynpaw ïa ka jingdonkam ban pynbun ïa ka jingpynsngew thuh paidbah bad ki lad jingïada.
Ha kane ka sngi la ïoh ka jingkren na ka Kong R. Passah, District Social Welfare Officer bad ïa ka jingïalang la pynïaid da Dr. M. Syngkon, District Surveillance Officer, Jowai bad Dr. S. Suja, DNi, NVHCP.
