Baghdad, Naitung:
Ka United States ha ka Sngi Ba-ar, ka la leit thombor ia ka Iraq ha ka jingpynhiar kput halor ka jingleh ka Iraq ha kine ki sngi ba la leit. Hynrei, la ong ba ka jingma ka long ba wat hapdeng ki jingiakynad bad ka jingbym shongsuk- shongsaiñ shuh ha ka thaiñ Middle East ruh, pynban ka US ka dang shlur ban leit thombor ia ka Iraq bad ban nang pynheh ia ki jingiakynad bad ki thma ha kum kane ka por ba kat sha ba phai ha kylleng ka pyrthei, la iohi sa tang ki jingma jong ki jingiakynad bad ki thma ba shyrkhei.
Watla katta, ym pat la ioh jingtip tikna la ka US ka don jingiadei ne em bad ka jingbthei bom kaba la jia ha ka thaiñ South jong ka Baghdad jong ka Popular Mobilization Forces ka Iraq.
Hynrei, la iathuh ba ha kitei ki jngbthei ha Iraq, ki la don 4 ngut kiba khlad bad 3 ngut kiba mynsaw katkum ka kaiphod ba la ioh lum da ka tnat syntiat bad katkum ka jingpynbna jong ka Iraq.
Ha katei ka jingpynbna, ka tnat shipai Popular Mobilization Forces jong ka Iraq kam shym la kdew kti iano- iano ruh ha kitei ki jingbthei.
Hynrei, ka US ha kane ka por ka la phla ba ha ka taiew ba la lah, ka tnat shipai jong ka US ka la ther ‘namding sha ki bynta jong ka Ain al-Asad jong ka Iraq, ha kaba ym shym la ioh jingtip ban don kiba ngat ne iap ha katei ka jingjia.
Kumta, la ong ba kane ka long ka sien ‘nyngkong ia ka US ba kan leit thombor hi da lade ia ka Iraq hadien ka jingleit ther bom jong ka US sha Iraq bad Syria ha u bnai Rymphang jong une u snem.
Ha utei u Rymphang, la ong ba ka US ka la leit ther bom sha ki 85 tylli ki bynta jong ka Iraq bad Syria ha kaba ki ktem lehnoh kiba don jingiadei bad ka Revolutionary Guard jong ka Iran ki don ha kitei ki bynta.
Ka Iraq, ka ioh jingkyrshan na ki lehnoh jong ka Iran ban pynjur ia ki kam thombor jongka khamtam naduh ba ka Israel ka la leit hiar thma ia ka kynhun lehnoh Hamas kaba synshar hi ia ka nongbah Gaza bad ha kaba la ong ba ka Iraq ka la dawa ia ka Israel ruh ba kam dei ban leit pynthud ia ka Hamas bad ka dei ban ai shongsuk ia ki paidbah nongshong shnong ka Gaza.
