Nongstoiñ, Nailar 02
Lehse kan dei ha ka sien banyngkong eh hapoh West Khasi Hills District ba ki shnong ki thaw bad ki nongshong shnong kin mih shakhmat ban pynpaw ïa ka jingsngewnguh lyngba ka jingmyntoi jong ki haba ki ïoh ïa kino-kino ki skhim na ka Sorkar hapoh ka shnong ka thaw.
Kane ka dei ka shnong Nongsohpian, West Khasi Hills ha kaba hadien da ki phew snem ba ki longïing hapoh kane ka shnong ki ïakynduh bad mad jingeh ha kaba ïadei bad ka umbam-umdih namar ka jingbym don ka um kaba ïoh lyngba na ka Sorkar, ïa kaba ki hap ban pynshitom ïalade da kaba leit tong bad kit na ki tyllong um ki bapher-bapher tang ban ïoh ban pyndonkam ha ki ïing ki sem.
Ka jingïoh ïa ka skhim Jal Jeevan Mission (JJM) kaba dei ka skhim na ka Sorkar Kmie, ka la pynlong shisha ka jingkmen ïa katei ka shnong hadien ba ka la ïoh syndon ïa ka umbam-umdih kaba khuid ba suba haduh ki tyngkong ïing bad kane ka la pynsuk bad pynkmen shisha ïa ki nongshong shnong.
Kane ka la paw ruh ha ka Sngi Thohdieng jong ka taïew ha kaba kane ka shnong, hadien ba u kontraktor u la pyndep ïa ka kam ban pyntrei ïa katei ka skhim JJM, kaba la mang haduh kumba T.83 lak la lah ban pyndep lut – kala ïoh bad pynlong ïa ka jingplie paidbah ha kaba u Superintendent Engineer (SE) ka PHE, Western Circle, u Bah A. M. Lartang bad Executive Engineer ka PHE, Nongstoiñ Division, u Bah D. Shabong ha ryngkat ka jingdonlang kiwei pat ki ophisar bad nongtrei ka tnad PHE, u Sordar Shnong, Bah Sirian Wahlang lem bad ki nongshong shnong ki la ïoh ban plie ïa katei ka um hapoh katei ka shnong. Haba kren ha ka jingïalang ba lyngkot ha katei ka sngi, na ka liang u SE, Bah A. M Lartang u la pynpaw ba ha ki 40 snem ba la leit, ka shnong ka la mad ïa ki jingjynjar namar ka jingbym ïoh ïa ka umbam-umdih kaba biang bad mynta pat ka la ïoh ïa kaei kaba la angnud bad kine ki 40 snem ki la long thik kum ka jingïaid lynti jong ki khun Isreal ban leit sha Rikanan. Kumta u la kyntu ïa ki nongshong shnong ba ki dei ban sumar bha ban pynneh-pynsah ïa ki tyllong um na ka bynta ban shngaiñ ka lawei ban wan.
Na ka liang u Executive Engineer, Bah D. Shabong u la ai jingïaroh ïa ka shnong Nongsohpian da kaba ong ba ka jingleh jong ki ka pyni ïa ka jingsngewkhia, jingsngewthuh bad kan long ka jingshai ne ka nuksa sha kiwei pat.
U ngeit skhem ruh ba kane ka umbam-umdih kan pynkmen bad pynsuk shisha ïa ki longïing-longsem jong kane ka shnong bad kyntu ïa iwei-pa-iwei ba kin sumar khuid bha ïa ka.
