Shillong, Nailar 02
Ka Meghalaya Professional Boxing Council (MPBC) ka la sei lai ngut ki rangïakura ban leit ïashim bynta ha ka Indian Pro Boxing Series 2024 ka ban long ha Mumbai.
Kine ki kynthup ïa u Shanborlang Marbaniang (52kg Super Fly), u Ïarapborsing Kharbani (57.153 kg featherweight) bad u Banshanbha Nongsiej (55.25 kg Super bantamweight).
Ïa kane ka lympung ïakura ban pynlong da ka Om Ayurveda Boxing Promotion hapoh ka jingkhmih da ka Indian Boxing Council, yn pynlong ha ka 4 tarik u Nailar 2024.
Kumba ka paw kane ka dei ka sien kaba khyndai ïa u Shanbor uba na Umlyngka, ha kaba u la jop san sien, ïakhaid ar sien bad shah rem shisien. Katba u Ïarapborsing uba na Sawmer Pynthor, u la ïalehkai san sien ha kaba u la jop ar sien, ïakhaid bad shah rem mar shisien. Hynrei kan dei ka sien kaba nyng-kong eh ïa u Banshanbha uba na Sadew ban ïashim bynta ha kane ka lympung ïakura.
Ha shwa ba kin mih na kane ka nongbah, na ka liang ka MPBC ka la pynlong ïa ka jingïalang kaba lyngkot ha ka Sngi Palei ha Nongkseh ha kaba la ïadon lang ki bor pynïaid kane ka synjuk ryngkat ki kmie bad kiba haïing hasem jong kitei ki khynnah.
Kane ka jingïalang ka long shi bynta ban ai khublei kitbok kitrwiang ïa kitei ki rangïakura ba kin ïalehkai bha ha katei khnang ba kin lah ban kheit ïa u soh ka jingjop.
Haba ïakren bad kitei ki rangïakura ki la pynpaw ba ki la long ba la pynkhreh ban leit shim bynta ha katei ka rynsan ïakura namar ki la ïoh ban kilanmet bha la katto katne por bad ki la pynpaw ruh ïa ka jingkhmih lynti ba kin ïalehkai bha khnang ban khur ïa ka jingjop.
Ha katei ka rynsan ïakura u Shanborlang un hap ban ïakhun haduh pha tylli ki wat ïakhun, kumjuh u Ïarapborsing un ïakhun haduh hynriew tylli ki wat bad u Banshanbha un ïakhun ha ki saw tylli ki wat ïakhun.
Kine ki rangïakura ki la mih na kane ka nongbah mynta ka Sngi Thohdieng ha kaba yn synran lang ryngkat ki bor pynïaid katei ka synjuk.
