Shillong, Nailar 02
Ka Kynhun Myntri ka la ai jingmynjur ban wanrah katto-katne ki jingpynkylla hapoh ka aiñ kaba hap ban pynrung kyrteng ïa ki nongtrei bylla kiba wan nabar Jylla ha kaba kito kiba pynkheiñ ïa ki kyndon jong kane ka aiñ naduh kiba wanrah nongbylla kin ngat ha ka kuna haduh T.1 lak hadien ba la pynheh ïa ka kuna kaba long T.5,000 baroh shi katta.
Ïa kane ka aiñ la tip kum ka Meghalaya Identification Registration (Safety and Security) of Migrant Workers Act, 2020 ha kaba la wanrah ïa ka jingpynkylla (amendment) bad la mynjur da ka Kynhun Myntri ha ka jingïalang kaba la long ha ka Sngi Thohdieng.
Ka Kynhun Myntri ka la rai ruh ban pyndonkam ïa ka Crime and Criminal Tracking Network System (CCTNS) ban ïoh jingtip kaba bniah shaphang ka jinglong-jingman jong ki nongtrei bylla kiba wan ban trei bylla sha kane ka Jylla.
Haba kren sha ki lad pathai khubor, u Myntri Sorkar u Bah Paul Lyngdoh uba dei ruh u nongaiktien ka Sorkar MDA, u la ong ba tang ki nongtrei bylla ki bym don dak sniew ha ka jingim jong ki, ki lah ban trei bylla ha kaba yn sa khmih bniah lyngba ka CCTNS da ka tnat pulit bad ka tnat Labour kan ïatreilang khnang ban pynrung kyrteng ïa ki nongtrei bylla ki bym don dak sniew ha ki kam runar.
Ha kane ka aiñ kaba la wanrah ïa ki jingpynkylla, ki don ruh ki kyndon ban daiñ kuna kaba la pynheh na ka T.5,000 sha ka T.1 lak bad kito kiba pynkheiñ ha ka sien kaba bud, kan don sa ka jingshah set patok kaba 3 bnai.
U Bah Paul u la ong lyngba ka jingpynwanrah ïa kine ki jingpynkylla hapoh ka aiñ, kan weng ïa ki jingtieng bad kan long ka jingshngaiñ ïa kito kiba wan trei bylla la ka dei kiba wan ïalam da ki kontraktor ne kompani kiba pyntrei ïa ki jingtei jingshna bapher bapher ne ki projek.
“Lada kiba wan trei bylla ki dei kiba la don dak sniew bad donkti ha ki kam runar ha ki Jylla jong ki, kum ïa kine ym lah satia ban pdiang ba rung kum ki nongtrei bylla ha kane ka Jylla,” la ong u Bah Paul.
Une u Myntri u la ong ba ki don ar jait ki briew kiba wan sha Meghalaya, kita ki long ki nongjngohkai bad ki nongshang suwari kiba shu wan shu leit, hynrei ki nongtrei bylla ki hap shong hap sah katto-katne por.
Haba kylli, katno tylli ki projek ki la shah ktah namar ka jingshah beh noh ki hajar ngut ki nongtrei bylla kiba nabar Jylla? U Bah Paul u la ong ba ka Meghalaya ka donkam ïa ki nongtrei bylla kiba nabar ka Jylla namarba ki duna ki nongtrei bylla trai jylla.
Kumta u la ong ba lada kam don ka jingkhmih bniah ïa ka jinglong ki nongtrei bylla, ka lah ban don ka jingma bad dei na kane ka daw ba hap ban pynrung kyrteng ïa ki nongtrei bylla bad tip ruh ïa ka jinglong jong ki.
U la ong ba ki kompani ne kontraktor kiba wanrah ïa ki nongtrei bylla ki hap ban kitkhlieh ban pynrung kyrteng ïa ki nongtrei bylla kiba wan ïalam na kiwei ki Jylla sha Meghalaya.
