Shillong, Nailar 02
Ka Umrynjah SC ka la long ka kynhun kaba nyngkong eh ban jam sha ka semi final ha ka lympung ïalehkai Under-20 Fourth Division Football League ba la pynïaid da ka Shillong Sports Assciation, hadien ba ka lah ban pynliem noh ïa ka Laitkroh S&CC da 5-1 kol ha ka Sngi Palei.
Kane ka nam jop ka la wan urlong lyngba ka hat-trick na u Wanboklang L. Nongbri, uba la lah ban thep marwei haduh saw kol.
Ha kane ka jingïakhun quarter final kaba la long ka SSA Stadium, ka Umrynjah SC ka la lah ban ïalehkai bha naduh kaba sdang ha kaba u Wanboklang u la ïoh ban thep haduh saw kol ha ka minit kaba 8, 26, 30 & 33 na ka bynta ban khur ïa ka hat-trick, katba ïa kawei pat la pynbud da u Milestone Umdor (23). Na ka liang ka Laitkroh ka la lah ban pynphai kylla shi kol lyngba u Skhemlang Kharkongor ha ka minit kaba 32 hashwa ba kan mat ïa ka jingshah rem.
