Baghmara, Nailar 02
Palat shi bnai hadien ka jingshah pynïap ka nongtrei jong kawei ka jaka kynshew pisa kaba shakri ha ka shnong Jadigittim, South Garo Hills, ki pulit ki la kem noh ïa 3 ngut ki briew kiba suba donkti ha katei ka kam.
Katkum ki kaiphod, katei ka jingjia ka la jia ha ka 30 tarik Jylliew mynta u snem, bad ka la pynkyndit shi kat dei ïa ka thaiñ baroh kawei.
Mar-mar hadien katei ka jingjia, la pynngat mukotduma ha thanat Nongalbibra hapoh ki kyndon 376/302 bad la thaw ruh ïa ka Special Investigation Team (SIT) ban tohkit halor katei ka jingjia.
Ki pulit ka SGH ki la kem noh ïa 3 ngut ki briew katkum ka jingtip syntiat bad ki kor teknoliji.
Ïa kitei la ithuh kum u David R. Marak (na Kacharipara, Chutipara, Goalpara – Assam), Demen Marak (na Tatol-gre, Bajengdoba, NGH) bad Salnara R. Marak (na Tatolgre, Bajengdoba – NGH).
La kynnoh ba kitei 3 ngut ki la pyrshang ban thaw ïa ka kynhun runar ban pyntyllun ïa ki kam pyntriem jong ki ha ki distrik bapher-bapher ka Ri-lum Garo.
“Mardor, hadien katei, la thaw ïa ka kynhun SIT ban tohkit halor katei ka jingjia bad hadien kane, ka kynhun jong ngi ka la kren ïa ki ‘riew paidbah bapher-bapher kiba la ïohi khatduh ïa ka lanot. Kiba bun ki la ïohi ïa ka lanot (nongshong shnong ka Assam) haduh kumba 8 baje mynmiet. Ngi la ap ban ïoh ksai ha kaba ïadei bad kane bad ngi la ïoh hadien ba uwei na kiba shah kynnoh u la pynmeh ïa ka ‘mobile phone’ jong ka lanot. Mar-mar ngi la mih ban leit kem ïa u bad ngi la lah ban kem ïa u na Nongchram, EGH,” la ong u SP ka SGH, Shailendra Bamaniya.
Hadien ka jingshah kem, u (Salnara) u la phla halor kaei kaba la jia bad pynithuh ruh ïa kiwei pat kiba donkti ba kynthup ïa uba shipara bad u, u David.
Ha ka miet jong ka jingjia, kitei 3 ngut ki la rung ha ïingsah jong katei ka lanot bad byrngem-byrsit ruh ïa ka da kaba pynap pistol bad lute ïa ka pisa bad jingdon-jingem na ka.
Hynrei ki pulit ki la kyntait ba ka don kano-kano ka jingthombor bad kdew ba ka daw halor ka jingshah pynïap ka dei namarba ka lanot ka ithuh ïa uwei na ki runar jong katei ka kynhun.
“Ban pyntikna ba ym lah ban pynithuh ïa ki, kitei 3 ngut ki la pynïap ïa ka lanot ha shuwa ban rong noh ïa ka pisa bad ki jingdon-jingem jong ka. Ngi la lap ksai hadien ba la pynmeh ïa ka ‘phone’ jong ka lanot bad kem noh ïa utei u briew. Hadien kane, u la phla halor kaei kaba la jia bad pynithuh ïa kiwei pat,” la ong u SP.
Katba ïa u Salnara la kem na Nongchram, u Damen Marak u la shah rah na ka shnong Dengnanggre hapoh Bajengdoba, NGH. Uba lai, u David (uba shipara bad u Salnara) u long uba kham jwat. Ïa u David la kem hadien 4 sngi lyngba ka jingtrei shitom ba khlem shongthait jong ka SIT na Assam.
“Ki la ai ruh sha ngi ïa ki tiar ba la pyndonkam bad ngi la ïoh ban kurup ruh ïa ka pistol kaba ki la rah lang na bynta katei ka kam. Ki la shah kem ha ryngkat ki sabut kiba biang. Kumba ka long, ki kwah ban thaw ïa ka kynhun runar,” la ong u Shailendra.
