Shillong, Nailar 02
Hadien ka jingseisoh jong ka Mission Football kaba nyngkong, ka Sorkar Jylla ka la pynbna ba shen kan sa plie sa ïa ka Mission Football-2 ha kane ka Jylla, la pynbna u Myntri Rangbah ka Jylla u Conrad K. Sangma ha ka Sngi Thohdieng.
Haba ïakren bad ki nongthoh khubor, u Conrad u la pynpaw ba ha ka wat kaba nyngkong ki la don kumba 100 tylli ki grassroots centre ha kylleng ki district ka Jylla. “Ngi la thmu ban nang kham pynbun ki grassroots centre ha ka lawei ka ban wan ha kylleng ka Jylla khnang ba ki khynnah kiba dangrit kin ïoh ka jingshah hikai kaba paka lyngba ki coach ka Jylla bad ruh ba kin nangkiew shaphrang ha ka kam ïalehkai phutbol.”
“Ka jingangnud ka jong ngi ka long ban plie lad ïa ki khynnah kin long kiba paw ym tang hapoh ka Jylla, hynrei ba kin nangkiew shaphrang ha ki lympung ïalehkai shabar jylla bad wat ha ki lymung ïalehkai bar ri,” u la bynrap.
Kumjuh ruh ka Sorkar ka la pynkhreh ruh ïa ki song jingïarap na ka bynta ki klob bapher bapher kiba don ha ka Jylla; kaba nyngkong ka dei ki Elite Club kaba mut ki klob kiba don ha ka kyrdan ïalehkai I-League bad shaneng. Ka ba ar ka dei na ka bynta ki klob kiba ïashim bynta hapoh ka Jylla.
“Kito ki klob kiba ïoh ïashim bynta ha ki lympung ïalehkai I-league bad shaneng kin ïoh jingïarap na ka Sorkar haduh T. 2 klur lem bad T. 1 klur ka ban wan lyngba ka ‘sponsorship’ khnang ba kan long ka jingkyrshan kaba khraw ïa ki klob kiba don ha ka Jylla,” u la bynrap.
Shuh shuh u la ong ruh ba na ka liang ka Sorkar kan ai jingïarap ruh haduh T. 15 lak na ka bynta ki klob kiba don ha ka Jylla khnang ban pynkiew ïa ki bad ba kin nangkiew shaphrang ha ki kam ïalehkai.
“Ha ka jingshisha na ka liang ka Sorkar ka la thmu ban ai jingkyrshan ïa baroh ki jait jingïalehkai, hynrei ïa mynta yn sdang shwa na ka phutbol.”
Ha kawei pat ka liang, u Myntri ka tnat ïalehkai u Bah Shakliar Warjri, u la ong ba ka Sorkar Jylla ka la shim ïa ka rai ba kan ïaid noh shakhmat ban seng ïa ka shlem ai jinghikai ka ban don bad ka jaka sah kaba tikna ïa ki khynnah (Residential Academy) ka dei jong ka Northeast United FC ka ban don ha Mawkhanu.
Khatduh ïawai, u Myntri Rang-bah u la ïathuh ruh ba ka jingpynkhreh na ka bynta ka 6th Meghalaya Games kaba la buh ban pynlong ha Jowai, West Jaiñtia Hills ha u Kyllalyngkot u snem u ban wan, ki kam hi baroh ki la sdang ban ïaid shakhmat naduh ka jingpynkhreh ïa ki jaka ïalehkai, ki jaka ban shong ban sah ki nongïalehkai bad kiwei kiwei.
