Shillong, Nailar 02
Ki synjuk ki nongtrei na ki skul bapher-bapher kiba don hapoh ka lama jong ka All Meghalaya SSA Non-Teaching Staff Association (AMSSAN TSA) ha ka 2 tarik u Nailar 2024, ki la leit ban ïakynduh biang sa shisien ïa u Commissioner & Secretary ka Sorkar Jylla, u Vijay Kumar ha shlem treikam ha Secretariat ban ïakren ha kaba ïadei bad ki jingdawa kaba ki la buh hakhmat jong ka Sorkar.
Kum ban shu kdew hangne, ka synjuk ka la mih paidbah ha ka 31 tarik u Naitung 2024, ha Madan Malki, Shillong ban pynlong da ka jingïakhih shong kyllaiñ-myngor kaba khlem buh por ban dawa na ka Sorkar Jylla ba ka dei ban kyntiew tulop noh ïa ki hadien 8 snem ba ka la neh kumjuh.
Na ka liang ka synjuk ka la dawa na ka Sorkar Jylla ba ka jingkyntiew tulop ïa ki ka dei ban long beit 80% ym tang 25% kumba la kular da ka Sorkar bad dawa ruh ba ka Sorkar ka dei ban kyntiew tulop 2% ïa ki nongtrei kiba la rangbah bad kiba la neh slem ha ka kam bad 5% ka jingkyntiew tulop kaba manla u snem.
Hashwa kane, na ka liang ka synjuk ka la leit ban ïakynduh ïa u Commissioner & Secretary ka Sorkar Jylla, ha ka 1 tarik u Nailar 2024, ha kaba ha katei ka sngi ka Sorkar ka la thaw da ka ‘Rationalisation Committee’ kaba dei ka Committee ka ban ïakren sani bha halor kane ka bynta.
Ha kane ka Committee, yn ïadonlang naduh u Commissioner & Secretary, u Vijay Kumar u ban long kum u Chairman, u Swapnil Tembe, u Bah Banteilang Kharshandi ryngkat ki dkhot bad nongkitkam jong ki nongtrei SSA. Ha katei ka jingleit ïakynduh, kitei ki nongïalam ka synjuk ki la pynpaw ïa ka jingbym hun namar ba kane ka jingïakynduh ka la long kumba ki shu kraid hajuh shi hajuh khlem sngewthuh-sngewthaw bad khlem jingseisoh haei-haei ruh bad ba baroh ki dkhot ruh ki khlem sngewhun satia ïa katei ka jingleit ïakynduh.
Ha ka jingïakren bad ki lad pathai khubor, na ka liang ka President, Kong Jennifer June Synrem, ka la ïathuh ba na ka liang jong ka Sorkar Jylla ka la ong ba kin sa shong pyrkhat biang ha kaba ïadei bad kane ka kam hynrei ka la ong ruh ba sa katno sien pat ba ka sorkar kan shong pyrkhat ïa kajuh shu kajuh.
“Katkum ki kyndon bad jingthoh, ngi khlem khmih ïa ki kaba long lehnohei ïa ngi ban thaw ïa ka Committee. Ngi ruh kum ka Association hi ngi pynpaw ba ngim hun ïa kane ka jingwan kaba mynta ka sngi”, la ong ka Kong Synrem.
Shuh shuh ka Kong Synrem ka la ong ba katba ka kynhun kam pat ïoh ïa ki jingdawa na ka bynta ban kyntiew ïa ka tulop na ka 25% sha ka 80% ïa ka bai nongtrei, da lei-lei ruh kin nym khih na katei ka jaka kaba ki la pynlong ïa ka jingïakhih. Ka la ïathuh ruh ba na ka liang jong ka Sorkar ka la ong pynban ba kan ai khyndiat-khyndiat ïa ka tulop jong ki bad naduh mynshwa ka Sorkar ka la ong kumta. Hynrei mynta ka la tyllun sha ki 8 tylli ki snem pynban ka Sorkar kam pat shym la pynkiew ïa ka tulop jong ki nongtrei SSA.
“Lada kim sngewthuh ïa ngi mynta, kin shu pynjlan sah kumne, ngi ruh ngim lah bad ngim hun ban pdiang hynrei ngi kwah ba ïa kata ka Committee kaba ki la thaw, ki dei ban leh noh wut-wut ban pyndep noh ïa ki kam khnang ba ngin ïoh leit noh sha la ki jong ki ïing ki sem”, la bynrap ka Kong Synrem.
