Shillong, Nailar 02
U Organising Secretary ka Voice of the People Party (VPP) Jaiñtia Hills, Bah Damewanhi Rymbai u la wer ïa u Bah Thombor Shiwat uba dei Chief Executive Member (CEM) ka Jaiñtia Hills Autonomous District Council (JHADC) ba un pynbeit ïa kawei ka jaka ban ïatai halor ka pisa kaba T.20 klur ba u la buhrieh.
Haba ïakren bad u Bah Damewanhi u la ong ba ka jingkren sarong kine ki nongïalam ka JHADC da kaba pynthohbria ïa ka VPP ki leh thik kum ka ïing lajong.
“Lada u CEM ka JHADC u ong ba ngim don hok ban tuklar ne u kwah ba ngin hikai, u dei ban pynbeit ha kawei ka jaka ban ïatai nia halor kane ka pisa 20 klur tyngka kaba u la buhrieh” u la ong.
U la ong kumba ka sorkar ka la dep siew ïa ka pisa sha ka JHADC, ki dei ban siew pyndep ïa ka tulop jong ki nongtrei kiba la shah pynduh tulop.
Nalor nangta, u la ong biang ba ha sorkar jylla la synshar ka NPP bad ha JHADC ruh la synshar da ka NPP. Lada ki ong ba ki la trei shitom ban ïoh ïa kane ka pisa ai ba ka burom kin ïoh ma ki hynrei ki dei ban siew lut ïa ka tulop sha ki nongtrei.
Shuh shuh u la pyntip ba na ka 30 klur tyngka, ka JHADC ka dang siew tulop saw bnai bad mynta ki dang pynkhreh ban siew tulop sa na kane ka T.20 klur ba ki buhrieh.
“Katba ka sorkar jylla ka pyllait pisa sha ka JHADC, ngin leit buddien beit” u la ong.
Ha kajuh ka por u la pyntip ba mynta u Nailar 2024 kaba kut ka jingai por ban siew tulop ïa ki nongtrei, lada kim lah ka seng ka la pynkhreh ban pynlong jingïakhih hakhmat ka JHADC.
