Shillong, Nailar 02
Ka Meghalaya Public Service Commission (MPSC) ka la kyntait ïa ka jingdawa jong ka Khasi Students’ Union (KSU) ban pynmih ïa ki ‘mark’ jong ki kyrtong kiba ïakhun ha ka eksamin Meghalaya Civil Service (Prelims).
“Ki kyrtong ki la pyrshah jur ïa ka jingtyrwa ban pyllait paidbah ïa ki ‘mark’ na bynta ka eksamin M.C.S (Pre-liminary Examination) namar ka jingpynkheiñ ïa ka hok jong ki (Right to Privacy) kaba dei ka ‘Fundamental Right’ kaba la kdew ha ka ‘Article’ 21 jong ka Riti Synshar ka Ri India,” la ong ka kyrwoh pynbna paidbah na u Secretary ka MPSC ha ka Sngi Thohdieng.
Katkum ka jingpynpaw ka Commission, ka jingpyllait paidbah ïa ki ‘mark’ eksamin khlem ka jingmynjur jong ki kyrtong ym tang ba kam i donkam hynrei ka long ka bym ïahap.
Na ka liang ka MPSC, ka la kdew ruh ba ka jingpyllait paidbah ïa ki ‘mark’ eksamin ka lah ban ktah ïa ki kyrtong la ka long ïa ki shimet ne ha ki kam ki jam ha ka jingim jong ki.
“Shuh shuh ka pynkheiñ ïa ka nongrim jong ka burom shimet,” la ong ka MPSC.
Haba ban biang ba ym lah ban pyllait paidbah ïa ki ‘mark’, ka Commission ha kawei ka liang ka la bynrap ba ka ai lad ïa ki kyrtong ban khmih bniah ïa ki ‘mark’ lajong lyngba ka rukom treikam ‘OTP’.
Kum ban shu kdew hangne, ki nongïalam bad dkhot ka KSU ha ka Sngi Palei ki la leit tur kynsan sha phyllaw jong ka MPSC ha Lachumiere bad thang ruh ïa ka shithi jubab kaba la ai da ka Commission halor ka jingpan jingpynshai ka seng.
Ha kane ka sngi, ki nongïalam bad dkhot ka seng ha ryngkat ki ‘Placard’ ki la leit tur sha phyllaw ka shlem treikam MPSC ban ïashong kyllaiñ-mungor, kum ka dak ban pyrshah ïa ka jingbym leh eiei ka tnad halor ki kynrum-kynram kiba mih na ka jingthungkam ïa ki MCS, MPS bad Statistical Officer ka tnad Animal Husbandry & Veterinary.
Lah ban pynkynmaw hangne ba ka KSU ka la dep ban ai por haduh 48 kynta ïa ka MPSC ban pyllait paidbah ïa ki ‘mark’ ba la ïoh da ki kyrtong ïakhun eksamin MCS (Prelim), ban pynshai ïa ka jingduna jong ki kyrtong ba shah jied ha ka Meghalaya Police Service ban leh ‘Personal Interview’ bad ka jingthungkam ïa 2 ngut ki ‘Statistical Officer’ ha ka jaka uwei katkum ka jingpynbna lait kam ba pynmih ha u snem 2019.
