Shillong, Nailar 02
Ka jingïakob ‘thei bhabriew kaba paw jong ka Jylla ïa kaba la tip kum ka ‘Miss Meghalaya 2024’ bad ka ‘Miss Teen Meghalaya 2024’ ka la long kaba la pynkhreh na ka bynta ka jingïakob phainal ka ban sa long ha ka 3 tarik u Nailar 2024, ha Lariti Multipurpose Hall kaba don ha Mawkasiang.
Ïa kane ka jingïakob ‘thei bhabriew la pynlong da ka Meghalaya Tourism bad ka tnad Arts and Culture, ka Sorkar Jylla.
Ha kane ka sngi u Myntri Rangbah ka Jylla, u Conrad K. Sangma un long kum u kongsan, katba u Myntri ka tnad Arts and Culture, Bah Paul Lyngdoh un long kum u symbud kongsan ha kane ka sngi.
Ïa kane ka jingïalang la kyrshan shuh shuh da ka Atomy India kum ka Beauty Partner bad ka Lakme Academy Shillong kum ka Makeup Partner, da kaba pynthikna ba ki nongïakob kin kiew rynsan bad pynpaw ïalade ïa kaba bha tam.
Mynta u snem baroh ki don 38 ngut ki nongïashim bynta, ha kaba 19 ngut kin ïakhun ban ïoh rah ïa ka nam ‘Miss Meghalaya 2024’ bad 19 ngut pat na ka bynta ka ‘Miss Teen Meghalaya 2024’.
Ka nongjop jong ka Miss Meghalaya 2024 kan pynthikna ban ïoh rung beit sha ka Miss Universe India 2024, katba kaba wan ha ka 1st Runner-up bad ka 2nd Runner-up pat, kin mihkhmat ïa ka Meghalaya ha ka Miss Northeast 2024.
Katba ka nongjop ïa ka Miss Teen Meghalaya 2024 kan ïoh leit ban mihkhmat ïa ka Meghalaya ha ka Miss Teen Diva 2024 ha Jaipur.
Da kaba kular ba katei ka jingïakob kan long kaba sngewtynnad bad ki nongïashim bynta ruh kin pynpaw ïa ka jingitynnad, ka sap, bad ka jingsarong ha ka kolshor jong ki ha ryngkat ka janmiet kaba ym lah ban klet ban rakhe ïa ka mynsiem jong ka jylla Meghalaya bad ban burom ïa ki mahadei thymmai jong ka jylla.
