Shillong, Nailar 02
Ka Sorkar Jylla kan hap pule bniah bad ïatai sani halor ka hukum jong ka Supreme Court kaba la bthah ïa ki Jylla ban weng noh ïa ki briew kiba la kiew ha ka ïoh ka kot bad kiew ha ka imlang sahlang ïa kiba kiba la tip kum ki ‘Creamy Layer’ wat lada ki dei ki Scheduled Caste (SC) bad Scheduled Tribe (ST).
Haba kylli kiei ki sienjam ba ka Sorkar Jylla kan leh katkum ka hukum jong ka Supreme Court, u Myntri Sorkar u Bah Paul Lyngdoh uba dei ruh u nongaiktien ka Sorkar MDA u la ong ba ïa kane ka mat yn hap ban pule bniah bad ïatai sani khamtam kat ïa ka hukum jong ka Ïingbishar kaba hakhliehduh jong ka ri.
U la ong ba ïa mynta ym pat lah ban ong ei ei hynrei yn hap beit ban pule bniah bad ïatai ïathir.
Ka don ka jingsheptieng ba kane ka hukum jong ka Supreme Court ka lah ban ktah ïa ka jingïoh bha ki jaitbynriew riewlum kiba dei ki trai muluk ha Meghalaya namar kiba bun ki ST ki lah ban ngat ha kata ka thup ‘Creamy Layer’ bad ka jingmyntoi na ka bhah kan kham dei ïa kito kiba dang kham shadien (backward classes).
Ka hukum jong ka Supreme Court ka dei kaba la pynmih katkum ka rai jong kiba bun ki nongbishar ha ka 1 tarik Nailar 2024 ha kaba la ong ba ka jingphiah biang ïa ka bhah hapdeng ki SC bad ST ka dei kaba lah ban leh (Permissible) da kaba ïaid lait noh na ka rai kaba mynshwa ha ka mukotduma u snem 2004 kaba ong ba ym shah ban phiah shuh shuh ïa ka bhah (sub classification of reservation) hapdeng ki SC/ST. Ki nongbishar kiba donbynta ha kane ka rai ki long u Chief Justice Chandrachud, nalor kiwei pat ki nongbishar kiba kynthup ïa u Justice BR Gavai, Vikram Nath, Bela M Trivedi, Pankaj Mithal, Manoj Misra, bad Satish Chandra Sharma.
Kaei kata ka ‘creamy layer’ hapdeng ki caste bad tribe? Ka ‘Creamy layer’ ka dei ka bynta ha kaba ki briew kiba don hapoh jong ka jingïoh bhah kiba dei ki scheduled caste bad scheduled tribe kiba la kiew bha ha ka ïoh ka kot bad kiew ruh ha ka imlang sahlang (economically and socially advanced).
