Nongstoin, Nailar 04
Ka kynhun ïalehkai jong ka Lawei Football Team ka la ïoh ïa ka jingjop ha ka sngi plie pyrda ïa ka lympung ïalehkai phutbol ïa kaba la tip kum ka 2nd Knockout Football Tournament 2024 kaba la pynlong da ka Mawkadiang Sports Club.
Ka nam tam jong ka Lawei FT ka la wan hadien ba ka la lah ban pynliem noh da 3-0 kol ïa ka kynhun ïalehkai jong ka Nongstoin Football Team ha ka jingïalehkai pyrshah kaba la long ha madan Mawkadiang ha West Khasi Hills ha ka sngi Saitjaiñ jong ka taiew.
Ha katei ka jingïalehkai, ïa ka nam ‘Man of the Match’ la ïoh ban khur da u Lee Syiemlieh na ka kynhun ïalehkai jong ka Lawei FT.
Ha kane ka lympung ïalehkai ki don kumba 16 tylli ki team na kylleng ki jaka bad ki shnong kiba la wan ban ïa shim bynta bad ka khusnam baroh ha kane ka lympung ka long 1.50 lak.
Shuh shuh ha kane ka sngi plie pyrda ïa kane ka lympung, nalor ki riew rangbah jong ka thaiñ la donlang ruh ki nongkitkam jong ka Mawkadiang Sports Club bad kiwei kiwei.
