London, Nailar 04 (UNI)
Palat 90 ngut ki briew ki la shah kem hadien ba la mih ka jingïakhih kaba jur ban pyrshah ïa ka jingwan rung be-aiñ ki mynder ha kylleng ka United Kingdom. Kane ka jingïakhih ka la sdang ha ka Sngi Saitjaiñ bad ka la bteng ha ka Sngi U Blei.
Katei ka jingïakhih pyrshah ïa ka jingwan rung be-aiñ ki mynder ka la sdang ha ki nongbah bapher-bapher jong ka United Kingdom hadien ba ka la don ka jingshah dung tari ha Southport, England, ha kaba lai ngut ki khynnah ki la ïap.
Katei ka jingshah kem jong palat 90 ngut ka la long hadien ba la mih ka jingïakynad bad ki pulit bad kumjuh ruh ka jingïakynad hapdeng kiba pyrshah ïa ki mynder kiba la rung be-aiñ bad kiwei, la ong ka lad pathai khubor SkyNews. Ki pulit ki khmih lynti ba ka jingïakhih kan nang jur ha kine ki sngi.
Napdeng kitei kiba la shah kem ki kynthup ïa 14 ngut ki nongïakhih ha Bristol, 20 ha Kingston upon Hull, palat 20 ngut ha Blackpool, Preston bad Blackburn, 23 ngut ha Liverpool bad 10 ngut ha Stoke-on-Trent. Sa lai ngut kiwei pat ki la shah kem na Belfast bad Leeds.
Ha ka 29 tarik Naitung, lai ngut ki khynnah kynthei ki la shah pynïap bad bun ngut kiwei pat ki la mynsaw jur hadien ba ka la don ka jingdung tari ha ka jaka shad (Dance Club) ki khynnah rit ha Southport. Kane ka jingjia ka la wanrah ïa ka jingïakhih kaba jur bad ki don ki khubor kiba la kam ba uba la donkti ha katei ka jingjia u dei u poiwir.
Ki bor jong ka aiñ ha UK ki la kynnoh ba ka English Defence League (EDL) ka la donkti ban wanrah ïa ki jingïakhih katba ki don ki lad pathai khubor kiba la kynnoh ba ka Russia ka la donkti. Hynrei na ka liang ka Embassy jong ka Russia ha London ka la kyntait ïa kane ka jingkynnoh.
