Shillong, Nailar 04
Ka Khasi Students’ Union (KSU) ha ka Sngi U Blei ka la ban jur ïa ka Sorkar Jylla ban pyntreikam pura ïa ka Meghalaya Residents Safety & Security Act, 2016 (MRSSA) bad buddien ïa ka mat halor ka Inner Line Permit (ILP) na ka Sorkar India.
“Ngi kwah ba ka Sorkar kan pyntreikam pura ïa ka MRSSA, 2016, kumjuh ban buddien ïa ILP na ka Sorkar India,” la ong u President ka KSU, samla Lambokstarwell Marngar.
Haba kdew ba ka aiñ ba la wanrah da ka Sorkar Jylla -Meghalaya Identification, Registration (Safety & Security) of Migrant Workers Act, 2020 (MIRSSMWA), ka dei tang ïa ki nongbylla, u la ong ba ki 2 tylli kiwei pat (MRSSA & ILP) ki kham khlaiñ shuh-shuh khamtam ban peitngor ïa ka rung ka mih jong ki briew ba nabar kiba wan shapoh ka Jylla.
Halor ka MIRSSMWA, u samla Marngar u la ong ba ha ka por ba ka seng ka ïakynduh ïa u Myntri Rangbah ka Jylla, u Conrad K. Sangma, ka la ïohi ba kane ka aiñ ka don bun ki jingduna bad namarkata ka la ban jur halor ka ‘Inter-State Migrant Workmen Act, 1979’.
Haba pdiang ïa ka jingwanrah jingkylla jong ka Sorkar ha katei ka aiñ, u la ong ba kane ka long katkum ka jingai jingmut jong ka seng.
“Ym tang ba ka don ka aiñ, hynrei ka dei ban treikam. Ki ophisar ka tnad Labour ki dei ban pynlong ka jingjurip ïa ki nongbylla la ki bud ryntih ne em ïa ka aiñ. Ngi la ai jingmut ba ki kyndon kim dei ban teh tang ïa ki nongbylla, hynrei ïa ki nongai bylla kumjuh. Ngi khmih lynti ba kane ka aiñ kan treikam hok khnang ban tehlakam ïa kito kiba khlem kot khlem sla,” la ong utei u nongïalam.
U President u la ban jur ruh halor ka jingdonkam ban pynshisha na ka tnad pulit ïoh don ki nongbylla (kiba wan sha ka Jylla) kiba don ïa ki dak sniew.
Haba kylli, u la bynrap ba wat la ka Sorkar ka la wanrah jingkylla ha katei ka aiñ, hynrei ka jingkhynra ïa ki kot ki sla jong ki nongbylla na ka liang ka seng kan ïai bteng.
Ka Kynhun Myntri ka Sorkar Jylla ha ka Sngi Thohdieng ka la mynjur ban wanrah katto-katne ki jingpynkylla ha ka aiñ (MIRSSMWA) kaba hap ban pynrung kyrteng ïa ki nongtrei bylla kiba wan nabar Jylla ha kaba kito kiba pynkheiñ ïa ki kyndon jong kane ka aiñ naduh kiba wanrah nongbylla kin ngat ha ka kuna haduh T.1 lak hadien ba la pynheh ïa ka kuna kaba long T.5000 baroh shi katta.
Na bynta kito kiba pynkheiñ ha ka sien kaba bud, kan don sa ka jingshah set patok kaba 3 bnai.
Shuh shuh ka Kynhun Myntri ka la rai ban pyndonkam da ka Crime & Criminal Tracking Network System (CCTNS) ban ïoh jingtip kaba bniah halor ka jinglong-jingman ki nongtrei bylla kiba wan bylla hapoh ka Jylla.
