New Delhi, Nailar 04
Ka jingïap briew ha Bangladesh ha ka Sngi U Blei ka la kot sha ka 91 ngut namar ka jingïakynad hapdeng ki nongïa-khih bad ki nongkyrshan ka seng Awami League kaba synshar ïa kane ka Ri.
Nalor kiba la ïap, ki don sa ki phew ngut kiba la mynsaw.
Dang tang katto-katne taïew mynshwa, palat 200 ngut ki briew ki la ïap ha ka jingïakhih ba la lam khmat da ki samla pule kiba la dawa ba dei ban pynduh noh ïa ka bhah kam sorkar kaba 30 per cent na ka bynta ki bahaïing hasem jong kito kiba la ïakhun ha ka thma ban pynïoh jinglaitluid ïa ka Bangladesh ha u snem 1971. Kine palat 200 ngut ki la ïap namar ka jingïakynad bad ki pulit.
Hadien ba ka jingïakhih ka la jai-jai, mynta ka sngi pat ka la sdang biang ha kaba ki nongïakhih ki la dawa ïa ka jinghiar shuki jong ka Myntri Rangbahduh, ka Sheikh Hasina. Napdeng kitei 91 ngut kiba la ïap mynta ka sngi, 14 ngut ki dei ki pulit, la ong ka lad pathai khubor AFP.
Ka jingïakynad ka la sdang mynta ka step ha ka por ba ki nongïakhih kiba la leit ïashim bynta ha ka jingïalang ban dawa ïa ka jinghiar shuki jong ka sorkar, ki la ïa tangon bad ki nongkyrshan ki seng Awami League, Chhatra League, bad Jubo League.
Na ka liang ka tnat Korbar Ri ka Bangladesh ka la pynjari noh da ka korphiw ha baroh kawei ka Ri naduh ka por 6 baje janmiet mynta ka sngi. Ka Hasina ka la ong ba kito kiba la donkti ha ki jingïakynad ha ka kyrteng jong ki jingïakhih ki dei ki ‘riew pyntriem bad ym ki samla pule, bad ka la kyntu ïa ki paidbah ba kin tangon tyngeh ïa ki.
Ka Hasina ka la khot ïa ka jingïalang jong ka National Committee on Security Affairs ha Ganabhaban, bad ka la ong, “Nga kyntu ïa ki nongshong shnong ban tangon tyngeh ïa kine ki ‘riew pyntriem.” Ha kane ka jingïalang la wan ban ïashim bynta ki khlieh duh ka tnat Army, Navy, Air Force, pulit bad kiwei.
Ki nongïakhih, hapoh ka lama jong ka “Anti-Discrimination Students Movement” ki la dawa ba ka Hasina ka dei ban hiar shuki bad kito kiba la shah pynïap ha ki jingïakynad ba dang shen ki dei ban ïoh ïa la ka hok.
Hynrei, kitei ki nongïakhih ki la kyntait ïa ka jingkhot ïakren jong ka Hasina. Ka Myntri Rangbahduh ka kwah ban don ki jingïakren khnang ban pynthanda ïa ka jingïakhih. Tangba kine ki nongïakhih ki la nang pynjur ïa ka jingdawa ba ka Myntri Rangbahduh ka dei ban hiar shuki noh.
