Nongpoh, Nailar 04
Ki nongshong shnong ka Umladoh kaba hap ha Nongpoh konstitwensi jong ka Ri-Bhoi District mynta ka sngi ki la pynpaw ïa ka jingsngewsih kthang bad pait dohnud halor ka jingwan pynjot dusmon ki bor ba dei khmih jong ka Khasi Hills Autonomous District Council (KHADC), Lailad Beat ïa ki jingthung-jingtep jong ki hynnin ka Sngi Saitjaiñ.
Kine ki nongshong shnong kiba mad bad shah ktah jur halor ka jingleh ka KHADC ki dei ki longkmie kiba ju im na ka kam rep kam riang bad kiba bsa ïa ka ïing ka sem ka jong ki lyngba katei ka kam rep – ki kynthup ïa ka Kong Prin Umsong, ka Kong Brina Sylliang, Kong Slis Lyngdoh, Kong Ormilis Lapang bad ka Kong Phiarnes Sylliang.
Kine longkmie ki la pynpaw ïa ka jingsngewsih kthang halor katei ka jingleh dusmon jong ki briew ka KHADC, kaba ki la kam ba ka dei ka jaka ka jong ki kaba ki la rep la riang mynta la bun-bun snem. Ki ong ruh ba ki don ïa ki kot ki sla ban pynshisha ba ka dei ka jaka ka jong ki da kaba pyntip ba ka jingshah pynjot ki jingthung-jingthep kynthup naduh ki soh ki pai, ki dieng kwai, dieng kait bad kiwei-kiwei.
U Rangbah Shnong ka Umladoh, u Bah Wet Syngkli u la pynpaw ka jingpynrem jur halor kane ka jingleh dusmon ka KHADC da kaba ïathuh ba ki bor ka KHADC ki wan ban pyntip ïa katei ka kam sha ki bor shnong ha ka 1 tarik u Nailar khlem da batai bniah. Hynrei kynsan-kynsan ha ka 3 tarik u Nailar wat hapdeng ka jingther u slap, ki la wan ban pom bad pynjot dusmon ka kitei ki jingthung-jingtep kiba kitei ki nongshong shnong ki im ja bad bsa ïa ka ïing ka sem.
Halor kane ka jingjia, utei u Rangbah Shnong u la dawa ba ki bor ba dei khmih ka KHADC ki dei ban shimkhia halor kane ka bynta ban ai ïa ka rai kaba hok ïa ki longïing kiba la shah ktah, naba ki bor ka KHADC ki khlem da ai satia ïa ka por kaba biang ïa kitei ki longïing naba kane ka jingleh jong ka KHADC ka long kum ka jingïuh roit ïa ka hok ki duk ki suk bad ki nongrep.
