Shillong, Nailar 04
Ka Punjab Football Club ka la lah ban pynliem noh ïa ka Everton katba ka East Bengal pat ka la shah liem noh ha ka Aston Villa ha ka lympung Next Generation Cup kaba dang ïaid shakhmat ha Bodymoor Heath Aston Villa Training Academy.
Kan long ka sngi sah jingkynmaw na ka bynta ka Punjab hadien ba ki la lah ban pynliem noh da 2-1 kol ïa ka Everton (youth) ka club ba ïakhun Premier League, kaba la pynlong ruh ïa ka Punjab ka kynhun ba-ar jong ka Reliance Foundation Developmental League ban khur jingjop pyrshah ïa ka kynhun ba ïakhun ha ka Premier League.
Haba phai sha ka jingïalehkai, dei ka Everton kaba la khyrwit kol nyngkong lyngba u Joel Catesby ha ka minit kaba 11, hynrei ha ka minit kaba 26 u Manglethang Kipgen u la ïoh ban pynphai ïa kane ka shi kol bad ha ka minit ba 43 u Usham Thoungamba Singh u la ïoh ban thep syndon ka kol kaba ar kaba la biang pura ban khur ïa ka jingjop.
Ka Everton ba la coach da u Leighton Baines ka la hiar madan ha kane ka jingïalehkai da ka jingkyrmen skhem, kata hadien ba ka la lah ban pynliem noh ïa ka East Bengal da 6-0 kol bad ka la ïoh ruh ka jingsdang kaba paka bha.
Haba phai pat sha kawei ka jingïalehkai, ka East Bengal FC ka la shah pynliem noh da 4-0 kol ha ka Aston Villa FC.
Ha kane ka jingïaleh-kai, naduh kaba sdang ka Aston Villa FC ka la lah ban ïalehkai bha khlem da ailad ïa ki rangïalehkai ka East Bengal ban ïoh bol bad khamtam lei ki rangïalehkai dien kiba la mad jingeh shibun.
Ïa ki kol jong ka Aston Villa la ïoh ban khyrwit da u Rory Wilson ha ka minit kaba 9, u Lani Edwards ha ka minit ba 16, u Omar Khedr ha ka minit ba 34 bad u Mason Cotcher ha ka minit ba 39.
