Tura, Nailar 04
U nongtrei mon sngewbha, u Junebirth Marak u la ther tyngeh halor ka jingkynnoh noh shiliang haba ïadei bad ka jingthung kam na bynta ki kam kontrak hapoh ka shlem treikam jong ka Director of Health Services (MI).
Ha ka kyrwoh ha ka step Sngi U Blei, u Marak u la ong ba ka jingpynbna na bynta 325 tylli ki kam hapoh DHS (MI) la dep pynbna ha ka 8 tarik Naitung bad ïa ka ‘Written Test’ la pynlong ha ka 27 tarik Naitung. Saw sngi hadien kane, kata ha ka 31 tarik Naitung, la pynbna ïa ka risol bad la jied ïa 1532 ngut ki kyrtong (shortlisted).
Ki don 213 tylli ki kam na bynta ka Ri-lum Khasi-Jaiñtia bad 112 tylli na bynta ka Ri-lum Garo.
“Na kitei ki kyrtong kiba shah jied, 1393 ngut ki la shah jied na bynta ka Ri-lum Khasi – Jaiñtia bad tang 139 ngut na bynta ka Ri-lum Garo. Ha WGH, 58 ngut ki la shah jied (5 ngut ki bym dei Garo) EGH – 23 ngut, South Garo Hills – 18 ngut, North Garo Hills – 23 ngut (1 bym dei Garo) bad South West Garo Hills – 17 ngut (11 ngut ki bym dei Garo),” u la ong.
“Na ki 139 ngut ki kyrtong ba shah jied na Ri-lum Garo na bynta 112 tylli ki kam, ïa kine yn hap ban weng shuh-shuh katkum ka jingkhmih bniah, ka ban ïalam sha ka jingduna kyrtong ban pyndap ïa ki jaka ba thylli ha Ri-lum Garo. Kaba kum kane kam pat ju jia koit mynno-mynno bad ka jingbym biang ha ka thung kam thung jam ka dei ka risol kaba shai jong ka jingbakla da ka Kong Ampareen Lyngdoh,” la ong u Marak.
Utei u nongtrei mon sngewbha u la kam ba ka Ri-lum Garo ka la mad ïa ka jingshah ñiewbeiñ ha baroh ki liang haba ïadei bad ka thung kam thung jam, hynrei ka tnad ka koit ka khiah, u sngew ba ka long kaba palat tam naduh ba u Ram Kumar u la shimti kum u Director bad ka Kong Ampareen Lyngdoh ka la long ka Myntri ka tnad ka koit ka khiah.
“Ngim lah pdiang ïa ki risol ba noh shiliang hapoh ka jingkhmih jong ki,” u la bynrap.
