Shillong, Nailar 04
U Additional Director General (ADG), BSF (Eastern Command), Kolkata, u Ravi Gandhi, ha ka jingwan jngoh ïa ka BSF Frontier – Meghalaya, u la khmih bniah ïa ki rukom treikam bapher-bapher bad ki mat ba ïadei bad ki bor pynïaid jong ka tnad hapoh ka Jylla.
Ha ka 3 tarik mynta u bnai, u ADG u la leit sha ki jaka khappud ka East Khasi Hills ban khmih bniah ïa ka jingtreikam ka tnad bad ki bor teknoliji.
U la ban jur ba ka BSF ka shakri ïa ka khappud India-Bangladesh ha ka rukom kaba paka bad kaba shit rhem wat hapdeng kiba bun ki jingeh ba ïadei bad jinglong-jingman ka jaka.
Ïa ka Meghalaya la ju bna na bynta ka aïom hap slap kaba hynñiew bnai kaba khlem sangeh. Hynrei wat hapdeng kine ki jingtynjuh, ki shipai khappud ki long kiba peitngor ban shakri hok ïa ka kam.
Ha ka 4 tarik mynta u bnai, u ADG u la pynïaid ïa ka jingïalang bad ki bor distrik lem bad ki ophisar pulit jong ki distrik ka Ri-lum Garo ba kynthup ïa u DIG (Police), DC & SP Tura lem bad ki ophisar ka tnad BSF.
Ka jingïalang ka kynthup ïa ka jingïakren ban kyntiew ïa ka jingshaniah bad ka jingïatreilang hapdeng ka BSF bad ka tnad pulit.
Ha kajuh ka por, u la jurip ruh ïa ka ‘Electronic Surveillance Grid’ kaba la pyndonkam ban peitngor ïa ki khappud bad ki rukom treikam.
Na ka liang u Gandhi u la ban jur halor ka jingdonkam ban pyndait ïa ki tiar peitngor bathymmai ban pyntikna ïa ka jingïaid beit ka rukom treikam ha ki khappud.
U ADG u la khmih bniah ruh halor ka mat ba ïadei bad ki kam be-aiñ, ka jingwan rung tuh bad ki kam khaïi be-aiñ ïa ki mar ki mata.
Haba kdew ba ki nongshong shnong ka Meghalaya ki long kiba jai-jai bad kiba don ka jingïajan paralok bad ki shipai ka tnad, utei u heh BSF u la ong ba ki nongshong shnong kim pdiang ïa ki nongwan rung tuh kiba kylla long pat ka jingban khia hadien-habud ïa ka ïoh ka kot.
Kumjuh haba pynpaw ïa ka jingshimkhia jong u ban khang ïa ka jingwan rung tuh kiba nabar, u la ai ka jingbthah bad ki buit ki ban ai jingmyntoi.
U la pynsngew ruh sha ka jingïalang ban kham peitngor bad ban jur ba haba ïadei bad ka jingshong shngaiñ ha shi lynter ka khappud India-Bangladesh – la nang pynkhlaiñ ïa ka jingpahara ban khang lad ïa kano-kano ka jingwan rung be-aiñ.
Shuh shuh u la ïaroh ïa ka jingtrei shitom jong ki ‘Field Commander’ bad ki shipai khappud ban tehlakam ïa ka jingrung tuh lem bad kiwei-kiwei ki kam be-aiñ ha ki khappud wat hapdeng ka jingshakri ha ka jingkylla suiñ bneng bad ka jinglong-jingman ka jaka jong ka Jylla.
U la ong ba ka BSF kan ïaineh ha ka ban pynneh-pynsah ïa ka hok bad ka jingshong shngaiñ jong ki khappud ka ri.
