Shillong, Nailar 04
Ka jingryngkang dieng kper jong lai na ki saw ngut ki MLA na ka seng Congress ka lah ban paw pyrthei noh ha kine ki sngi hadien ka jingbym ïasngewthuh jingmut bad u Bah Vincent H Pala uba dei u President ka Meghalaya Pradesh Congress Com-mittee (MPCC).
Ki khubor kiba ïajan bad ka seng Congress bad National People’s Party (NPP) ki la ïathuh ba napdeng ki saw ngut ki MLA Congress, lai ngut ki lah ban leit pynïasoh pura noh sha ka seng NPP kaba dei ka seng kaba ïalam ïa ka sorkar ha Meghalaya hapoh ka jingïalam u Conrad K Sangma kum u Myntri Rangbah ka jylla.
Ki khubor ki ïathuh ba kine lai ngut ki MLA ki lah ban leit pynïasoh pura sha ka seng NPP ha shwa ban sdang ka Dorbar Synrai ka ban sdang naduh ka 23 tarik u Nailar bad kut haduh 30 tarik jong u juh bnai.
Ki MLA ka Congress ki sah mynta sa saw ngut hadien ba u MLA na Gambegre Constituency u Saleng A Sangma u la shah jied kum u MP ka Tura Constituency Lok Sabha.
Ki khubor ki ïathuh ba ka jingkhreh ban mih noh jong kine lai ngut ki MLA Congress ka dei namar ba kim ïasngewthuh jingmut bad u Bah Vincent namar u la don ka jingïadei kaba jan bad ki nongïalam ka NPP, bad kumta haba u President ka MPCC u la don jingïadei, kine ki lai ngut ki lah ban rung beit sha ka seng NPP.
Kane ka jingïapher jingmut ki MLA ka Congress ka la sdang shwa ka ilekshon MP Lok Sabha haba ki la don ki MLA Congress kiba khlem la mih bha ban leit pynshai ïa ka nongrim sha ki paidbah.
Hadien ba la kut ka ilekshon, ka la don ka jingdawa ban pynkylla noh ïa u President ka MPCC hynrei ym don ba sngap.
Kum ban shu pynkynmaw, ka jingïapait-jingïapra hapoh ka seng Congress ka dei naduh ba ka AICC ka la thung ïa u Bah Vincent uba dei u MP ka Shillong Constituency ha kato ka por kum u President ka MPCC ha kaba 12 ngut ki MLA Congress hapoh ka jingïalam u Dr. Mukul Sangma ki la mih noh.
Hadien kata san ngut ki MLA ka Congress kiba sah ruh ki la shah pynshitom shipor tang namar ki leit ai jingkyrshan ïa ka sorkar MDA-1.
Haba u nongthoh khubor u la pyrshang ban ‘phone’ ïa kine saw ngut ki MLA Congress ym don uwei ruh u ban shim ban ai jubab halor kane ka khubor.
