Shillong, Nailar 04
U Lakshya Sen u la shah rem noh ha ka jingïakhun semi-final jong ka Men’s Single Badminton, katba ka Lovlina Borgohain pat ka la shah liem noh ha ka jingïakhun quarter-final ha ka Boxing.
Haba phai sha u Sen, u la mad ka jingshah rem ha u Viktor Axelsen, uba dei ruh u Champion ka Olympic ha ka jingïaleh-kai kaba la long ha ka sngi U Blei.
Ha kane ka jingïakhun u Sen ba dang 22 snem u la shah rem noh da 20-22 bad 14-21 ha ka jingïa-khun ba la neh 54 minit.
Watla u la shah rem noh, u Sen un dang don sa kawei ka kabu ban kylla long u nong India ba nyngkong ha ka liang ki shynrang ban jop takma ha ka Olympic, kata ynda un ïakynduh pyrshah ïa u Lee Zii Jia uba na Malaysia ha ka jingïaknieh ïa ka takma rnong.
Ka India kam pat ju jop takma ksiar ha ka Olympic ha ka jingïaleh-kai badminton, ha kaba ka PV Sindhu ka la jop ïa ka takma rupa bad rnong ha Rio bad Tokyo Olympics bad ka Saina Nehwal ka la jop takma rnong ha ka London Games.
Ha kawei pat ka jing-ïalehkai, ka Lovlina Bor-gohain ka la shah rem noh ha ka jingïakhun pyrshah ïa ka Qian Li kaba na China ha ka quarter-final jong ka Women’s 75kg (boxing) kaba la long ha North Paris Arena ha ka sngi U Blei.
Lah ban pynkynmaw ba ka Lovlina ka dei kaba la khur takma rnong ha ka Tokyo 2020 Games, hynrei ha kane ka kynti kam shym la lah ban jam sha-phrang hadien ba ka la hap ban ïakhun pyrshah ïa kawei na kiba khlaiñ kaba na China.
