Nongstoiñ, Nailar 04
Ka Dorbar Shnong Mawkhlam-Nongpyndeng ka la maham tyngeh ïa ki ‘riew shim kabu kiba donkti ban thang dusmon ïa kawei ka jaka shna jingshna ne ‘Furniture Unit’ kaba don hapoh u pud u sam jong ka shnong kaba la jia mynta la arsien kynthih.
U Secretary ka Dorbar Shnong Mawkhlam-Nongpyndeng ha ka kyrwoh khubor u la ong ba hadien ba ka Dorbar ka la ïatai sani bha ïa ka jingshah thang jong kawei ka jaka shna jingshna (furniture unit) jong u Bah Donboklang Syiem, kaba don hapoh u pud synshar shnong jong ka shnong Mawkhlam-Nongpyndeng, kaba la jia mynta la arsien kynthih, na ka liang jong ka shnong ka la maham tyngeh ïa ki ‘riew shim kabu la ki dei ki ‘riew shimet, ne kiba shim kabu ha ka kyrteng jong ki kynja Seng (NGO), ne la ki dei kino-kino Seng kiba leh ïa kiba kum kine ki kam bad lada ka Dorbar Shnong ka lap, kan kem bad pynshitom da kaba tyngeh.
U la ong ba kum kine ki jingleh ‘riewkhlaw ki la sdang roi na kawei ka por sha kawei pat bad kiba kum kine ki jingjia kin ktah shibun ïa ki khun samla kiba dang sdang ban seng ïa la ki jong ki kam bad kiba la sdang ban kiew irat ha ka kam jong ki. Namarkata, ka Dorbar Shnong Mawkhlam-Nongpyndeng ka ïawer bad kyntu ïa baroh ki para nongshong shnong jong kane ka thaiñ ban ïa kyndit bynriew noh bad ban ym aili ïa kiba kum kine ki jingjia nangne shakhmat, namar kane kan ktah ïa iwei-pa-iwei kiba don jingthmu ban seng kam lajong.
Ka shnong ka pyntip ruh ba ïa kane ka jaka shna jingshna la dep ai jingbit da ka Dorbar Shnong hadien ba la bishar bniah ïa ki kot ki sla jong ki nongtrei hangne kiba dei ki bar jylla bad kiba la dep pynrung ïalade hapoh ka tnad Labour Department, jong ka Sorkar Meghalaya.
