Shillong, Nailar 04
Ka Lumparing Sports Club ka la ïoh ban rah ïa ka nam lahduh ne ka nam Champion ha ka lympung ïalehkai kaba la tip kum ka Women Football Tournament 2024 ïa kaba la pynïaid da ka Pay For Right Youth & Cultural Club (PFRYCC) kaba la long ha ka 27 tarik jong u bnai Naitung, 2024 ha Madan Malki hadien ba ka la lah ban pynliem noh ïa ka Combined Women Team da 3-2 kol ha ka jingïalehkai ïa ka final kaba itynnad.
Ka jingïalehkai hapdeng kine artylli ki kynhun ka long kaba itynnad bha ha kaba ha kylla step ka Lumparing SC kala ïoh lypa ban thep 2-0 kol. Ha ka kylla miet ka jingïalehkai ka la wanrah ïa ka jingkylla ha kaba ki ‘thei jong ka Combined Women Team ki la ïakhun tyngeh bad ïoh ban pynphai nyngkong shi kol, hynrei hapdeng katto katne minit ka Lumparing SC kala ïoh thep biang sa kawei ka kol kaba pynlong ïa ki ban tam da 3-1 kol, hynrei ha shwa ban kut noh ka por ka Combine Football Team kala ïoh ban pynphai biang sa shi kol ha kaba khatduh ka jingïalehkai ka kut noh da 3-2 kol.
Ha katei ka sngi, ka Myntri ka Sorkar Jylla ka Kong Ampareen Lyngdoh, kaba dei ruh ka MLA ka thaiñ ka la ïadon lang kum ka kongsan lem bad ki dkhot jong ka club.
Ha shwa ban pynsdang ïa katei ka lympung la ïoh shwa ïa ka prokram ai jingpynshai ha kaba ïadei bad ka jingpang HIV/AIDS bad kumjuh ka jingai jingpynshai ïa ki kynthei ha kaba ïadei bad ka shongkha shongman khnang ban lait na kane ka jingpang kaba ktah ruh ïa ki khyllung lada ki pun khun.
Na ka bynta kane ka lympung, ka PFRYCC ka la ïoh ruh ïa ka jingkyrshan na ka CMYDS 2021-22, District Sports Promotion Scheme, MCAB, Yess Meghalaya bad MACS.
