Shillong, Nailar 04
Ka samla Bahun Nongrum ka la jop kum ka ‘Miss Meghalaya’ katba ka samla Fortunate Mika Dkhar kum ka ‘Miss Teen Meghalaya’, 2024.
Ïa kane ka rynsan la pynlong ha ka Sngi Saitjaiñ ha Lariti Multi-purpose Hall, Mawka-siang.
Ka samla Chaivalry Lartang bad ka samla Lily Kharthangmaw ki la jop ha ka 1st bad 2nd Runners-up ha kane ka jingïakob ‘thei bhabriew. Ka samla Bahun kan mihkhmat ïa ka Meghalaya ha ka ‘Miss Universe India’ 2024, katba ka samla Chaivalry bad ka samla Lily kin mihkhmat ïa ka Meghalaya ha ka ‘Miss Northeast’ 2024 ka ban long ha Itanagar, Arunachal Pradesh.
Ha ka kyrdan ‘Miss Teen’, ka samla Palei Chyne bad ka samla Nikita Nongrum ki la wan ha ka 1st bad 2nd Runners-up. Ka samla Fortunate kaba jop ïa ka ‘Miss Teen’ kan mihkhmat ïa ka Meghalaya sha ka rynsan ‘Miss Teen Diva’ ka ban long ha Jaipur, Rajasthan.
Ïa kane ka rynsan la pynshongkun shuh da ka jingdon u Myntri ka tnad jngoh kai pyrthei, Bah Paul Lyngdoh, kumjuh u Bah Sanbor Shullai, Chairman ka Meghalaya Tourism Development Corporation (MTDC) nalor u Bah Federick Roy Kharkongor, Principal Secretary ka tnad Arts & Culture.
Ki nongbishar ha kane ka jingïakob ki long u Amjad Khan, Director ka Operations and Marketing for Miss Universe India; ka Arshina Sumbul, Miss Grand International India 2023; ka Divija Gambhir, State Director for Miss Universe Rajasthan and Miss India Multinational 2021; bad u Mele Pucho, State Director for Miss Universe Nagaland.
