Shillong, Nailar 04
Ka India ka la lah ban pynliem noh ïa ka Great Britain da 4-2 kol, kaba la wan lyngba ka jingshut penalty kaba la long ha ka sngi U Blei, bad ban ïoh rung syndon sha ka semi-final jong ka ‘Men’s Hockey’ ha ka lympung Paris Olympics 2024 kaba dang ïaid shakhmat.
Kane ka jinglah jong ka India, ka la wan ruh lyngba ka jingïalehkai bha jong u nongap kol jong ka, u PR Sreejesh uba la lah ban ïada bun tylli ki bol ban rung sha kol, khamtam lei hadien ba ka India ka la duna noh uwei u rangïalehkai, na ka jingshah sei ‘Red Card’ jong u Amit Rohidas ha ka second quarter.
U PR Sreejesh u la lah ban ïada ïa ka bol ba la tied da ki ar ngut ki rang-ïalehkai ka Great Britain ha ka penalty shootout na ka bynta ban pynlong ïa ka India ba kan ïoh ban buh jaka ha ka semi-final, bad ban pynkhreh ruh ban ïa-khun ïa ka nongjop na ka jingïalehkai hapdeng ka Argentina pyrshah ïa ka Germany.
Kane kan dei ruh ka sien ba nyngkong kata na-duh u snem 1972 ha Munich ba ka India ka la ïoh rung sha ka semi-final ha ka Men’s Hockey ha ki ar tylli ki Olympic Games, kata mynta bad ruh ka sien ba khatduh ha ka Tokyo Games.
Haba phai sha ka jingïalehkai, ka India ka la hap ban ïakhun noh tang da 10 ngut haduh palat 40 minit hadien ka jingshah sei ‘red card’ jong u Amit Rohidas, hynrei ka dang lah pat ban khur jingjop kaba khraw pyrshah ïa ka Ri kaba bat ïa ka kyrdan kaba ar ha ka pyrthei, kata lyngba ka penalty shootout, hadien ba ka jingïalehkai ka la kut noh ha ka jingïakhaid da mar shi kol.
Watla ka la duh noh uwei u rangïalehkai, hynrei dei ka India kaba la ïoh thep kol nyngkong lyngba u Harmanpreet Singh ha ka minit kaba 22 kaba la wan na ka penalty corner hynrei tang ha ka minit ba 27, ka Great Britain ka la ïoh ban pynphai ïa kane ka shi kol lyngba u Lee Morton.
