Shillong, Nailar 04
Ka jingïakhih ha Bangladesh baroh kawei ka la sdang biang mynta ka Sngi U Blei hadien ba ki samla pule ki la mih paidbah ban dawa na ka sorkar ban pynshitom ïa ki pulit kiba la siat ïap ïa ki samla pule kiba la ïakhih ha kine ki sngi ba la leit.
Kane ka jingïakhih ka la sdang jai-jai ha kine ki taïew hadien ba ka sorkar Bangladesh hapoh ka jingïalam ka Sheikh Hasina kum ka Myntri Rangbahduh ka la mynjur ïa ka jingdawa jong ki samla pule ban pynduh noh ïa ka jingai bhah ïa ki khun-ksiew jong kito kiba ïakhun laitluid ha u snem 1971 ban lait na ka jingshah synshar ha ka Pakistan.
Hadien ba ka jingshongsuk ha Bangladesh ka la sdang ban wanphai biang, sa shisien ki samla pule ki la mih pyrthei biang ban dawa na ka sorkar Bangladesh ban pynshitom ïa ki pulit kiba la siat ïa ki ha ka por ba dang jur ka jingïakhih.
Haba ïoh ban ïakren bad ki Khasi ha Bangladesh, ki la ïathuh ba ka sorkar Bangladesh ka la sdang khang biang ïa ka ‘internet bad wifi’ mynta ka sngi hadien ka jingïakhih ka la sdang biang ha ka por 11 baje mynstep.
Ki la ïathuh ba kine ki samla pule ki la pdiang ïa ka jingmynjur ka sorkar Bangladesh ban pyndam noh ban ai bhah bun ïa ki khun ksiew jong ki nongïaleh laitluid da kaba ai noh tang 5 percent ïa ki bad 95 percent kan long ïa baroh ki khun samla kiba donsap.
Nalor kane, ki la ïathuh ba kine ki samla pule kiba la ïakynduh biang mynta ka sngi ha Dhaka ki la pynlong biang ka jingïakhih haduh ba ka jingïap ka la poi shaduh 53 ngut.
Nangta shuh shuh ki la ïathuh ba ki paidbah na kylleng ki jaka sor bad nongkyndong kin leit lut sha nongbah Dhaka ban pynlong ka jingïalang kaba heh duh ha ka 6 tarik mynta u biang. Kumta kiba bun ki la sdang ban mih naduh mynta ka sngi namar don kiba ïaid da ka kjat namar bym don kali ba la sdang biang ka jingïakhih.
Ki la pyntip ba ki samla pule kiba la shah pynïap ki la poi da ki spah ngut tangba ym don ba tip hynrei kiba paw pyrthei dei tang 53 ngut.
Haba phai sha Sylhet ka sor kaba marjan bad ka Dawki ka la sdang ban kynjah mynta ka sngi naduh ba la bteng biang ka jingïakhih.
Ki khubor ha Bangladesh ki ïathuh ba ki don 13 ngut ki pulit jong ka thanat Enayetpur ha Sirajganj kiba la shah pynïap hadien ba ki ‘riew paidbah ki la leit thombor ïa katei ka thanat ha ka Sngi U Blei. Sa 6 ngut ki dkhot jong ka Awami League kaba dei ka seng kaba synshar ha Bangladesh ki la shah bom ïap ha kane ka sngi ha ka jingïaleh pyrshah hapdeng ki nongkyrshan jong ka seng bad ki ‘riew paidbah kiba pyrshah ïa ka bhah thung kam jong ka sorkar ha Narsingdi.
Ha ka jingjia ha Sylhet jong ka Golapganj, ki don 2 ngut ki briew ba la shah siat ïap bad sa 25 ngut kiba mynsaw ba kynthup ruh ïa ki pulit ha ka por 2.30 nohphai sngi jong ka Sngi U Blei, kaba dei ka sngi jong ka jingïaleh pyrshah jong ki samla pule ïa ka sorkar ha katei ka ri.
