Shillong, Nailar 04
U MLA barim ka Mawlai u Bah Process T Sawkmie u la pynpaw ba ki Sport Club kiba don ha Mawlai ki la shem jingeh bha ha kine ki sngi kiba mynta, naba kim ïoh hok ïa ki jingïarap haba ki donkam ïa ka.
U Bah Process u la pynpaw ïa kane ha shwa ban aiti ïa ka song jingïarap pisa sha ka Mawtawar Sports Club ha ka prokram kaba la pynlong hapoh ïing shnong jong ka Mawtawar ha ka Sngi Saitjaiñ.
Ym tang ïa ka Mawtawar SC, hynrei mynha ka Sngi Balang, ka 01 tarik u Nailar, u Bah Process u la aiti ruh ïa ka song jingïarap pisa sha ka Umrynjah SC bad ka Nongkohlew SC.
U la aiti ïa kane ka song pisa ha u President ka Mawtawar SC u Bah Peter Mukhim, ha ka jingdon ryngkat u rangbah shnong Bah Cornelius Kharkongor, ki rangbah dong, ki nongkitkam ka Mawtawar SC, ki rangïalehkai bad kiwei kiwei.
Ka Mawtawar SC kan sa mih madan ha ka lympung ïalehkai 1st Division jong ka Shillong Sports Association kaban sa long shen mynta u snem, katba ka Umrynjah SC ka la ïoh rung sha ka semi-final jong ka 4th Division bad ka Nongkohlew ka la rem noh ha ka quarter-final jong kajuh ka kyrdan ïalehkai ha ka Sngi Saitjaiñ.
U Bah Process haba kren ha ka jingïalang lyngkot ha Mawtawar, u la pynpaw ïa ka jingsngewkhia haba u peit ïa ka jinglong jingman ki Sports Club hapoh Mawlai. U la ong ïa ki paidbah nong Mawlai kin hap ban ïa buh ïa u dak jingkylli uba heh bha, kaei kaba pynlong ïa u ba un mih shakhmat ban ïarap ïa ki sports club, wat la um long eiei shuh.
Hooid kum u MLA barim u ieit ban shakri paidbah bad um lah ban shu peit khlem da leh eiei, khamtam haba ka wan ka jingud jingnam ha u.
Haba pynpaw ïa ka jingsngewnguh, u Bah Peter Mukhim u la ong ha ka por long MLA u Bah Process, ki ïoh kylluid bha ka jingïarap pisa, kaba long shi lak tyngka. Katba u Secretary ka Umrynjah SC u Bah Reading Kharshiing ruh u la ai khublei ïa u Bah PT Sawkmie halor ka jingai jingïarap.
