New Delhi, Nailar 04
U Myntri Rangbahduh ka ri, u Narendra Modi u la ong ba u khaw-ïong na Manipur, Assam bad Meghalaya u long uba biang bha bad uba mon da kiba bun namar ka jinglong dawai jong u.
U Modi u la ong ïa kane haba ai jingkren ha ka jingïalang plie ïa ka ’32nd International Conference of Agricultural Economists (ICAE)’ kaba la long ha National Agricultural Science Centre (NASC) Complex, New Delhi ha ka Sngi Saitjaiñ.
Haba ai nuksa halor ka rep ka riang kaba khlem ai dawai, u Myntri Rangbahduh u la ong ba ki risol jong ka jingmanbha ban kyntiew ïa ka rep ka riang ka bym ai dawai ha ka rukom kaba ïar, lah ban sakhi hapoh ka ri.
Halor ka jingshimkhia jong ka Sorkar ha ki kam wad bniah bad ka roi ka kiew haba ïadei bad ki jingthung kiba ïaishah ïa ka jingkylla suiñ bneng, u Modi u la ong ba kumba 1900 tylli ki jingthung thymmai kiba ïaishah ïa ka jingkylla suiñ bneng la dep aiti sha ki nongrep ha kine ki 10 snem ba la leit.
U la ai nuksa ruh halor ki jait khaw ha India kiba donkam 25% ka jingduna um ban ïa kiba ju thung barabor bad ka jingmih jong u klhaw ba ïong kum u jingbam uba tei.
“U khaw-ïong na Manipur, Assam bad Meghalaya u dei uba la mon da kiba bun namar ka jinglong dawai jong u,” u la ong da kaba bynrap ba ka India ka long kaba kloi ban ïasam ïa ki jingshem jong ka sha ka pyrthei.
Katei ka jingïalang kaba don ïa ka phang, “Transformation Towards Sustainable Agri-Food Systems” ka thmu ban tehlakam ïa ka jingdonkam na bynta ka rep ka riang kaba neh hakhmat ki jingtynjuh pyrthei kum ka jingkylla suiñ bneng, jingduh jong ki jingdon-jingem mariang nalor kiwei-kiwei.
Haba kdew ïa ka jingkhlaiñ jong ka jingwad bniah bad jingpule ha ka rep ka riang ha India, u Modi u la ong, “Ka ICAR da lade ka sngew sarong namar ka jingdon jong palat 100 tylli ki ‘Research Institute’.”
U la ong ruh ba ki don palat 500 tylli ki kolej pule ba ïadei bad ka rep ka riang bad palat 700 tylli ki ‘Krishi Vigyan Kendra’.
Haba pynkynmaw ïa ka ‘International Conference of Agricultural Economists’ kaba khatduh kaba la long ha India 65 snem mynshuwa, u Myntri Rangbahduh u la ong ba ka India ka dang long ka ri laitluid bathymmai – bad mad ïa kiba bun ki jingtynjuh haba phai sha ka jinglong shngaiñ ka bam ka dih bad bad ka rep ka riang na bynta ka ri.
Shuh shuh u Modi u la bynrap, “Mynta ka India ka dei ka ri kaba dap pura ha ka liang ka bam, kaba pynmih bun eh ka dud, shana bad ki musli-musla, bad kaba ar haba phai sha ka jingpynmih bam (food grain), soh, jhur, kynphad, shini, slasha bad ka dohkha ba ri.”
Nalor kane, u la pynkynmaw ïa ka por ha kaba ka jinglong shngaiñ jong ka bam ka dih ka India ka long kaei-kaei kaba sngewkhia na bynta ka pyrthei, hynrei mynta, ka India ka pynbiang ïa ki jingai jingmut haba phai sha ka bam ka dih ha kylleng ka pyrthei.
