Tura, Nailar 04
U nongïalam ka BJP bad MDC ka Tura, u Bernard Marak u la ujor ejahar pyrshah ïa u kontraktor na Tura halor ka jingkynnoh shukor ïa ki nongshong shnong bad ban pynbiang ïa ka kaiphod thok sha ka Sorkar Pdeng halor ka projek JJM (Augmentation of Jebalgre) kaba la ai sha u da ka tnad PHE ha u snem 2022.
Ïa ka ejahar la ujor ha u Superintendent of Police ka West Garo Hills ha ka Sngi U Blei.
Katkum ka jingkdew u MDC ka Tura, ïa ka kam JJM la ai sha u Aiok M. Sangma, uba khlem ka jingpyntreikam u la aiti ïa ka kaiphod thok kaba pyni ba la pyndep 60% ïa ka kam – katba ki shnong hapoh kane ka projek ba kynthup ïa ka Jebalgre, Dikkimpara, Dopogre, Dosagre ki la shah pynduh noh ïa ka umbam-umdih.
“U kontraktor u la leh klet ïa ka kam pynban u la kam ba ka Jebalgre ka la ïoh ïa ka jingpynïasoh kaba 100% ha ka liang ki ‘pipe’ um, hynrei ha ka jingshisha, ym shym la don eiei. U Aiok M. Sangma, u la kyntait ruh ïa ki ‘call’ jong ka tnad PHE ban pynsted ïa ka kam kumjuh ban pyndep ïa ka kam ha ka por ba la buh. Ki shnong kiba hap ha ka Jebalgre WSS ki la sha pynduh ïa ka umbam-umdih kaba khuid bad suba namar ka jingbym shimkhia jong u kontraktor,” la ong u Bernard ha ka ejahar. Haba kdew ba u Sangma ym tang ba u la shukor ïa ki nongshong shnong, hynrei ïa ka Sorkar Pdeng da kaba aiti ïa ka kaiphod thok, u Bernard u la dawa pynshitom ïa u Sangma bad ban pynngat mukotduma katkum ki kyndon jong ka aiñ.
Ha kawei ka liang, utei u nongïalam ka BJP u la ong ba kin dang don shuh ki ejahar ki ban sa ujor pyrshah ïa kito kiba aiti ïa ki kaiphod thok ha ki sngi ban wan.
