Shillong, Nailar 05
Ka Rangdajied United FC ka la mad ïa ka jingshah rem da ka said ha ka FC Goa da 3-4 kol ha ka jingïalehkai kaba nyngkong jong ka Group-F jong ka 133rd IndianOil Durand Cup kaba la long ha ka Lah Sngi U Blei ha JN Stadium, Polo.
Kane la wan urlong lyngba u Vellington uba la ïoh ban thep shwa ban wan na ka bynta ban pynlong ïa katei ka kynhun ïalehkai jong ka Indian Super League ban khur ïa ki lai point.
Wat la ka Rangdajied United FC kam shym la ïoh ban pynkhreh pura ïa ka kynhun namar ha i por ba lyngkot ka la ïoh rung sha kane ka lympung na ka daw ba weng noh ka Hyderabad FC ban ym ïashim bynta shuh namar ki jingeh ba ka la ïakynduh. Ka Rangdajied hapoh ka jingïalam u Aibanjop Shadap (coach) ka la lah ban ïalehkai bha naduh kaba sdang ha kaba ka la ïoh ban pynkhih jar nyngkong eh lyngba u Owanijuh Pajuh ha ka minit kaba 19. Kane ka shi kol ka la ïai neh haduh kaba kut jong ka kylla step.
Hadien ar minit ba la bteng ïa ka jingïakhun jong ka kylla miet, ka FC Goa ka la lah ban pynïakhaid kylla lyngba u Leander D’Cunha. Kane ka kynhun ka la la pynbud biang ïa ka kol kaba ar lyngba u Devendra Dhaku Murgaokar ha ka minit kaba 58 na ka bynta ban tam da 2-1 kol.
Hadien lai minit ka Rangdajied ka la lah ban pynphai kylla lyngba u Pynbha, hynrei ka FC Goa ka la lah ban thep ïa ka kol kaba lai lyngba u Abawiha ha ka mint kaba 79. Shwa ban wai ka Rangdajied ka la lah ban pynïakhaid lyngba u Apbor ha ka minit kaba 86.
Hashwa ban wai artad ka FC ka la ïoh ban thep ïa ka kol kaba saw bad kaba khatduh lyngba u Vellington ha ka minit kaba 90+6 na ka bynta ban khur syndon ïa ka jingjop.
Ka Rangdajied kan pynkhreh ban ïakhun pyrshah ïa ka Shillong Lajong ha ka sngi Saitjaiñ ha ka por 4 baje janmiet, katba ka FC Goa ïa ka Tribhuvan Army ha ka 8 tarik.
