New Delhi, Nailar 05
U President ka Bangladesh, u Mohammed Shahabuddin, ha ka Lah Sngi U Blei u la ai hukum ban pyllait noh ïa ka Myntri Rangbahduh barim bad ka nongïalam bapawkhmat ka liang pyrshah, ka Khaleda Zia, hadien ba ka nongshun saiñpyrthei jong ka, ka Sheikh Hasina, ka la hap ban hiar noh na ka shuki Myntri Rangbahduh bad ban phet syndon na la ka jong ka Ri.
Ka kynhun ba dei khmih ïa ki kam lad pathai khubor jong u President ka Bangladesh ka ïathuh ba ka la don ka jingïalang hapoh ka jingpynïaid jong u Shahabuddin bad la rai da kawei ka sur ban pyllait noh mardor ïa ka nongïalam jong ka Bangladesh Nationalist Party (BNP), ka Khaleda Zia.
La ong u khlieh duh jong ki shipai, u General Waker-Uz-Zaman, ryngkat bad ki khlieh ki shipai suiñ bad shipai duriaw ha ryngkat ki nongïalam jong ki seng ba don ha ka liang pyrshah kum ka BNP bad Jamaat-e-Islami, ki la ïashim bynta ha katei ka jingïalang bad u President.
Shuh shuh ha u kyrwoh khubor la pyntip ba katei ka jingïalang ka la rai ban pyllait lut ïa baroh kito kiba la shah kem ha ka jingïakhih jong ki samla pule.
Mynta ka sngi, u heh duh ki shipai, u General Waker-Uz-Zaman u la pynbna paidbah ba ka Sheikh Hasina ka la hiar shuki bad ba ki shipai kin sa thaw da ka sorkar ba shipor.
Ka Khaleda Zia, 78 snem ka rta, kam don satia hapdeng ka met ka phad kaba koit ba khiah bad ka don hapdeng ka jingthiah pang ha Hospital. Kane ka nongïalam ka la shah rai pynrem ban shong patok haduh 17 snem ha u snem 2018 halor ki kam bamsap bamngem.
