Shillong, Nailar 05
Ha ka sien kaba nyngkong eh ka Young Talent Badminton Club (YTBC) kaba na Mawlai kan pynlong ïa ka lympung ïalehkai 39th State Badminton Championship 2024 ha Indoor Training Hall jong ka SAI Training centre kaba don ha Nehu naduh 28 haduh 31 tarik mynta u bnai.
Ïa kane ka lympung kaba hap hapoh ka jingkhmih da ka Megha-laya State Badminton Association, yn kyrshan lang da ka tnat ïalehkai jong ka Sorkar Jylla bad yn wan ïashim bynta da ki nongïalehkai na kylleng district jong ka Jylla.
Halor kane ka jingpynkhreh na ka liang ki dkhot nongkitkam ka YTBC ryngkat u MLA ka Mawlai Constituency u Bah Brightstarwell Marbaniang kumjuh ka Block Development Officer (BDO) C&RD Block, Kong Dahunshisha Lyngdoh bad u Secretary ka Meghalaya State Badminton Asso-ciation u Suresh Kamal, ha ka Lah Sngi U Blei ki la pynlong ka jingleit jurip ïa ka jaka ïalehkai ha SAI Training centre ha kaba ki pynpaw ka jingsngewhun hadien ba la dep ban maramot ïa ka jaka ïalehkai bad ka dei ka sien kaba ar ban pynlong ïa ka jingïalehkai badminton hadien ka South Asian Games kaba la long ha u 2016.
“Kane ka long ka sien kaba ar ba ngi la wan jurip ïa kane ka jaka bad mynta ngi la lap ba ka la long kaba biang ban ïalehkai namar la dep ban maramot ïa ki kato katne ki bynta. Ka jingwan kane ka lympung ha ka shnong Mawlai ka long ka jingsarong kaba khraw namar ka dei ka sien kaba nyngkong eh ïa ka YTBC ban pynlong ïa kane ka lympung,” la pynpaw u Bah Brightstarwell haba ïakren bad u nongthoh khubor hadien ba la dep ban jurip ïa katei jaka.
“Kumba ngi tip ba ïa kane ka lympung ïalehkai yn kyrshan da ka tnat ïalehkai jong ka Sorkar Jylla, hynrei na ka liang jong nga kum u MLA kat kaba nga lah ngan leh la ka bynta bad ngan ïatrei ryngkat naduh kaba sdang haduh kaba kut kane ka lympung ïalehkai,” u la bynrap.
Ha kawei pat ka liang ka BDO Kong Dahunshisha u la pynpaw ia ka jingsngewkmen ba ïa kane ka lympung yn pynlong hapoh ka block ka jong ka. “Ngi khmih lympung ban pynlong ïa kane ka lympung kaba jop namar ka long ka rynsan ban plie lad ïa ki khynnah ba kin pyni ïa la ki sap ki jong ki.
Na ka liang u Secretary ka MSBA u Suresh Kamal u la pynpaw ba hadien ba la pynlong ïa ka jingïalang kaba la long ha u Naitung, na ka liang ka synjuk ka la pynkhamti ha ka YTBC ban pynlong ïa kane ka lympung. “Kumba kane ka jaka ka la ïoh ban pynlong ïa kiba bun ki lympung ïalehkai, ngi kyrmen ba kan long kaba jop.”
“Ngi khmih lynti ba kumba 250 ngut ki nongïalehkai na kylleng ka Jylla kin wan ïashim bynta ha kane ka lympung namar ka long ka long ruh ka rynsan ban jied ïa ki nongïalehkai kiba kynsai ki ban mihkhmat ïa ka Jylla sha ka North East Inter State Badminton Championship ka ban long ha Guwahati, Assam naduh 7 haduh 10 tarik u Nailur mynta u snem,” u la bynrap.
