Holon, Nailar:
Ha kane ka khubor, la ong ba uwei u nong Palestine u la leit thombor bad dung pyniap ia arngut ki briew ha Israel ha ka Sngi U Blei bad ruh ban pynmynsaw sa 2 ngut kiwei pat ha katei ka jingjia.
Kane ka la jia ha ka por mynstep jong katei ka Sngi U Blei hapoh ka nongbah Holon kaba don marjan bad ka nongbah Tel Aviv. Utei u runar, la ong ba u la leit tur beit-beit sha katei ka jaka paidbah bad u la dung pynmynsaw ia kat kiba u iakynduh ha ka lynti iaid jong u hajan jong kawei ka jaka theh umphniang.
Ha katei ka jingjia, la iathuh ba 2 ngut kitei kiba khlad ki kynthup ia uwei u rangbah bad kawei ka kynthei. Katba ïa kiba mynsaw pat, la pynkit noh mar-mar sha ka jaka sumar kaba don ha katei hi ka nongbah na ka bynta ki jingsumar kiba kyrkhieh.
Ki pulit ka Israel ki la iathuh pat ruh ba ki la ioh ban tehlakam noh ia utei u suba lehnoh jong ka Palestine ha shuwa ba kaei-kaei kaba kham sniew kan wan jia ia ki paidbah ka Israel ha katei ka sngi.
La ong ruh ba ki pulit ka Israel ki dang wad bniah shuh shuh halor ka jingsuba don kti jong utei u runar bad kiwei pat ki kynhun lane bad ki lehnoh ka Palestine napoh ka nongbah Gaza, namar la sngewthuh shai ba kane ka long ka jingpynhiar kput namar ka jingleit hiar thma jong ka Israel pyrshah ia ka Hamas hapoh Gaza.
Haba iadei bad kane ka jingjia, ka kynhun lehnoh Hamas, kaba dang don hapdeng ka jingiakhun thma bad ka Israel ha Gaza, ka la kynthoh bad ong ba katei ka jingshah thombor ki paidbah ka Israel, ka long ka bai-nong halor ka jingleit hiar thma ki shipai ka Israel ia ki paidbah nong Palestine ba lui-lui bad ka long ruh kum shi bynta, ka bainong halor ka jingleit thombor bad jingpyniap jong ka Israel ia u nongialam ba hakhlieh duh jong katei ka kynhun lehnoh, u Ismail Haniyeh, ha kane ka taiew ba la dep hapoh ka nongbah Tehran jong ka Iran katba utei u nongialam ka Hamas u dang leit ban sakhi ia ka jingpynbam smai ia u President ka Iran ha katei ka por.
