Dhaka, Nailar 05 (UNI)
U Sajeeb Wazed Joy, uba dei u khun jong ka Sheikh Hasina, ka Myntri Rangbahduh barim ka Bangladesh, u la ong ba ka kmie jong u kan ym wanphai shuh sha ka saiñpyrthei, bad u la bynrap ba ka Hasina ka la sngewsih kthang halor ka jingïakhih pyrshah ïa ka wat la ka la pyrshang ban wanrah ïa ki jingkylla ha Bangladesh.
Haba ai jingkren ha ka BBC World Service’s Newshour Programme, u Joy, uba la long kum u nongaibuit jong ka Myntri Rangbahduh barim, u la ong ba ka Hasina ka la pyrkhat naduh ka Sngi U Blei ba kan iehnoh ïa ka shuki.
“Ka la sngewdiaw palat ba wat hadien ba ka la trei shitom, ka la don ka jingïakhun pyrshah ïa ka,” la ong u Joy.
“Ka la wanrah jingkylla ha Bangladesh. Ha ka por ba ka la shimti, la kheiñ ïa ka Bangladesh kum ka Ri ka bym poi shuh shaei-shaei. Ka dei ka ri baduk. Haduh mynta ka sngi, la kheiñ pat ïa ka Bangladesh kum kawei na ki Ri ba la sdang ban kiew ha Asia. Ka sngewsih jur bha,” la ong u Joy.
Nalorkata, u la kyntait ïa ki jingkynnoh ba ka sorkar jong ka Hasina ka la pyndonkam palat da ka bor ban teh lakam ïa ki jingïakhih.
Hadien ba ka jingdawa da ka ‘Students Against Discrimination’ ba ka dei ban hiar shuki noh ka la sdang ban jur, ka Sheikh Hasina ka la aiti ïa ka shithi iehnoh kam bad ka la mih noh syndon na Bangladesh.
Ka la mih da ka ‘helicopter’ jong ki shipai ha ka por kumba 2:30 mynsngi bad la synran da ka para jong ka, ka Sheikh Rehana. Hadien kata, ka la shong noh da ka liengsuiñ bad ka la wan phet sha India.
