Shillong, Nailar 05
U MLA ka Mawsynram u Bah Olan Sing Suin u la pynpaw ka jingsngew ïahap ïa ka sur bad ka rai jong ka Dorbar Shnong Mawsynram ha kaba ïadei bad ka jingkhang ban pynlong ïa ki jinglehniam hapoh ka krem Mawjymbuiñ.
Lah ban pynkynmaw ba dang shen na ka liang jong ka Dorbar Shnong Mawsynram ka la mih sha-khmat ban pynpaw ïa ka jingpyrshah jur bad ban nym shah ïa ki ‘riewngeit Hindu ban pynlong kum ka jaka mane blei ïa ka krem Mawjymbuiñ, kaba dei ka jaka jngohkai ym ka jaka mane Blei.
Kane ka jingmih jong ka Dorbar Shnong Mawsynram ban khang bad ban nym ailad, ka la long hadien ba ki ‘riewngeit Hindu ki la thmu ban pynlong ïa ka jingïaid ‘Yatra’ ne ïaid kjat na nongbah Shillong shaduh kane ka krem bad ban lehniam ha kane ka krem ha ka 10 bad 11 tarik mynta u bnai.
Ha kaba ïadei bad kane, u MLA ka Mawsynram u la ong ba ka la ju don ka jingïaid ‘yatra’ jong ki ‘riewngeit Hindu ha kine ki snem ba la leit ha kaba kum ka Dorbar Shnong Mawsynram ruh ka la sakhi ba kane ka la wanrah ïa ka jingjaboh ïa ki sawdong sawkun jong kane ka krem.
U Bah Suiñ u la ong ba u la dep ban ïakren ruh bad ki bor pynïaid District bad ïoh jingtip ba shisien ba kum ka Dorbar Shnong kam shah, kumta ka jingai jingbit na ki bor pynïaid district ruh kan nym treikam satia, namar ha ka jingai jingbit ba mynshwa ka bor district ka la buh kyndon ba ki dei ban ïoh jingbit na ka shnong.
U MLA u la ong ba katei ka krem kam dei ban long ka jaka mane blei hynrei ka dei ban long ka jaka pdeng na ka bynta ki kam jngohkai pyrthei bad na ka bynta ki paidbah baroh, namar lada pynlong jaka mane blei na ka bynta kano-kano ka jait niam, kan pynlong pat ïa kiwei ban nym sngewtynnad.
