London, Nailar:
Katkum ki khubor, la ong ba ki pulit jong kitei ki 2 tylli ki ri ki la kem da ki phew ngut ki briew hadien ba ki jingïakhih ha kylleng ki bynta jong ka England bad Northern Ireland ki la jur bad poi shaduh u pud- ka jing ia-umsnam ha ka Sngi Saitjaiñ ba la lah, ha kaba ka sorkar ka la kular ban leh da kaba tyngeh pyrshah ïa kito kiba shim kabu ban pynkhih win lyngba ka jingshah pyniap ki lai ngut ki khynnah kynthei tang ban ioh thaw jingkulmar.
Namar la ong ba ka jingiakhih paidbah ka la shyrkhei ha kitei ki ri naduh ki shnong kyndon haduh ki thaiñ sor bad khamtam eh ha katei ka ri Bilat hadien ba lai ngut ki khynnah kynthei ki la iap ha ka jingshah thombor bad shah pyniap ha katei ka jingjia kaba la jia ha ka thaiñ Shatei Lam Mihngi jong ka England ha ka taiew ba la dep.
Kumta, ki pulit kim banse ban shu kem bad rah noh ia kitei kiba thaw jingkulmar baroh khnang ban ioh ban tehlakam ia kitei ki jing ia-umsnam bad ban pyn jai-jai ia ki jingiakhih kiba la pur ha kitei ki 3 bynta.
Ha ka Sngi Saitjaiñ, ka la mih ka jingkulmar kaba shyrkhei, ha ki nongbah bapher ha kylleng ka ri, kiba kynthup ia ka Liverpool, Bristol, Hull bad Stoke-on-Trent, bad kumjuh ruh ha ka nongbah Blackpool, ha kaba ki pulit katei ka nongbah, ki iathuh ba ki la kem ym duna ia ka 87ngut ki briew. Nalor kane, ka la mih ruh sa kawei ka jingkulmar ha Manchester bad ha Belfast.
Kumta, la ong ba hapdeng kitei ki jingjia, ki dukan bad ki jaka treikam ruh ki la shah pynjulor bad shah lute, ki paidbah nongiakhih ki la thang syndon ruh ia kawei ka jaka kynshew kot ‘Library’ ha Liverpool bad katto katne ngut ki pulit ki la mynsaw na kitei ki jingjia ha katei ka sngi.
Shuh shuh ruh la ban jur ba kitei ki jingiakhih paidbah ha kane ka Sngi Saitjaiñ ba la lah, ki long kiba la jur bha hadien katto katne sngi ba la dep sakhi lypa ia ka jingkulmar namar kitei hi ki jingjia pyniap.
Namar la ong ba ka sien ba khatduh ba katei ka ri ka la sakhi ia ka jingiakhih paidbah kaba jur tam, ka long ha u snem 2011 ha kaba da ki hajar ngut ki briew ki la mih sha surok bad sha ki lynti- synkien ban iakhih halor ka jingsiat iap jong ki pulit ia uwei u briew uba lieh hapoh ka nongbah London.
